Santa Maria Pirates ta derotá Santa Rosa Memories ku skor 18-2 djasabra 14 di november den final Beisbòl Veterano

‍
WILLEMSTAD – E bataya final den Beisbol Veterano a kuminsá ku un dominio apsoluto. Djasabra mèrdia na Vi Jansen Ballpark, e ekiponan di Santa Maria Pirates i Santa Rosa Memories a midi forsa den e promé enkuentro di e seri final, unda Santa Maria a dal un paso firme pa bira kampion despues di un viktoria inkreibel di 18-2 riba Santa Rosa. Evenon Martis tabata den gran forma komo picher pa Santa Maria i Jo Andy Balentina a bati di 2-2. Yurendell de Caster a dal un homerun.

Santa Maria na un paso di bira kampion.

‍
Ku e triunfo akí, e "Piratnan" ta pika dilanti 1-0 den e seri final ku ta mihó di tres. E preshon ta riba Santa Rosa Memories awe, djadumingu 15 di novèmber, ora ku e di dos wega di e final tuma lugá  na Vi Jansen Ballpark kuminsando pa 2’or di pm. Si Santa Maria gana, nan lo gana e seri 2-0, konkistando e título di kampion di e temporada i lo tin e seremonia ofisial di entrega di premio. Si Santa Rosa rekupera i gana, nan lo empatá e seri 1-1, obligando un terser i desisivo wega pa otro siman pa definí e kampion.

Fanátikonan di Beisbòl Veterano ta  invitá pa yega trempan na Vi Jansen Ballpark pa sostené nan ekipo, nos lo sa awe atardi!

Santa Rosa Memories i kai vensi den wega number 1.

‍

MAS INFORMASHON DI BEISBÒL I SÒFTBÒL

Lesadonan di Deporte Kòrsou, bon dia i felis siman. Baranka a selebrá nan título en grande djarason na un Chines na Gosieweg i nos tin detaye den e artíkulo. Mañan ta kandela tin na Vi Jansen Ballpark na momentu ku Santa Rosa Memories topa ku Santa Maria Pirates na Vi Jansen Ballpark. Djarason nos a papia riba titulonan di Santa Maria na 2019 i 2021 i esun di 2009 di Santa Rosa Memories. Nos tin vários historia di Bèisbòl Veterano bon wardá i nos tin detaye di e wega final kaminda Santa Rosa Memories a bira kampion riba Yesterday na 2006.

‍
* * * * *
Ata algun detaye aki. Santa Rosa Memories ku bon picheo di nan manager i fundadó Edmond ‘Momon’ Martina a gana Yesterday Machine Shop Gabriela ku skor di 6-4 pa bira kampion di Bèisbòl Veteranos pa di dos aña sigí. Un públiko grandi a akudí na Vi Jansen Ballpark pa mira e gran partido aki. Momon Martina a bai henter e ruta pa bira e picher ganadó. Yesterday a lucha hopi pero a keda kòrtiku. E numeritonan tabata: Santa Rosa a nota na 6 okashon, dal 6 hit i hasi 1 eror. Edmond ‘Momon’ Martina a gana i Sendley Reina a bati di 2-1 ku un homerun. Yesterday a skor 4 kareda, konektá 7 hit i hasi 3 eror. Fitzgerald ‘Lali’ Pieter a pèrdè i Frensel Petronilia a bati di 3-2.

‍
* * * * *
Premionan final tabata: Kampion, Santa Rosa Memories; Sup-Kampion, Yesterday Machine Shop Gabriela; Terser Lugá, Santa Maria Food Center i na di 4 lugá, Vosama. Kampion bate tabata Pursey Geertruida (Santa Maria Food Center) 15-33, .545. Lider homerun: Riley Toppenberg, Dennis Gustina, Jose Cijntje i Rignald Hooi ku 2. Kampion picher: Richard ‘Sha’ Moesker (Yesterday) 6 ganá i 0 pèrdí. Bèk den tempu den gran forma. Saludo pa Jose Cijntje ku ta Jopito Cijntje ku lo kòrta esaki i mand'é den group. Un dje batiadónan super poderoso tempu di su tempu den Liganan di Sòftbòl i Liga 40/50 den Bèisbòl.

‍
* * * * *
Ban pa e weganan head-to-head entre Santa Maria Pirates i Santa Rosa Memories. Dia 2 di ougùstùs ekipo Santa Rosa Memories a gana di Santa Maria ku skor di 7-5. Ramses Jamanika a gana pa Santa Rosa i Gerald Gregorius a resultá e picher pèrdèdó pa Santa Maria. Randy Kirindongo a dal un homerun den e wega ei. Dia 12 di sèptèmber tabata ekipo Santa Maria ku a gana di Santa Rosa ku skor di 7-3. Myson Cathalina a gana e wega ei relatívamente fásil den relevo. Ramses Jamanika tabata e picher pèrdèdó pa ekipo Santa Rosa. Dia 25 di òktober tabata ekipo Santa Maria Pirates ku a sali viktorioso ganando 2-1 den un tremendo duelo di picheo entre Ramses Jamanika i Everon Martis. Ramses Jamanika tabata e picher pèrdèdó Evenon Martis e ganadó.

‍
* * * * *
Kiermèn Santa Maria a gana dos biaha i Santa Rosa un biaha e aña aki. (sin konta e final aden) Santa Maria tin batiadónan resio manera Eldred Estanista (.442), Myson Cathalina (.441), Jason Naaldijk (.424), Bertrand Peters (.400), Ardley Jansen (.389), Roderick Zimmerman (.371), Ryan Samuel (.343), Luisgardo Alvarez (.340), Gerthon Matrona  (.333), Jermaine Esprit (.292), Jo-Andy Balentina (.259), Yurendell de Caster (.256). Bateo kolektivo di Santa Maria ta .354. Den picheo, Gerald Gregorius a tira 41 inning (ERA 2.20), Myson Cathalina 28 inning (ERA 1.75), Evenon Martis 22 inning (ERA 1.25), Amador Nita 11 inning (ERA 4.94). ERA kolektivo di Santa Maria ta 2.38.

‍
* * * * *
Pa loke ta e sifranan di Santa Rosa nos tin Dave Kirindongo (.543), Marvin Ludowika (.512), Roderick Eustatius (.471), Randy Kirindongo (.447), Andy Leer (.436), Aldrich Isenia (.360), Shuremy Fornerino (.357), Henkie Pinedo (.342), Raillison Isenia (.333), Stanford Landburg (.286), Signald Paz (.222). Kolektivo Santa Rosa a bati .394. Den picheo ekipo Santa Rosa Memories tin Ramses Jamanika 42 inning (ERA 2.00), Roderick Eustatius 15 inning (ERA 0.47), Signald Paz 10 inning (ERA 3.50), Stanford Landburg 8 inning (ERA 5.25) i Marvin Ludowika 5 inning (ERA 0.00). Picheo kolektivo ta 2.31.
* * * * *
Liga 60 ta sigi djadumingu 2’or na Frank Curiel Ballpark ku weganan semifinal entre ekipo Lions i Los Amigos. E wega aki a keda suspendé siman pasá debí na awaseru i mal estado di tereno. By the way Santa Maria a dal Santa Rosa durisimo djasabra 14 di novèmber ku skor di 18-2. Nos ta keda te aki pa awe i te djaluna ku Poder di Dios.

‍

‍