Santa Rosa Indians ta dal Royal Scorpions 9-1 i bai ariba 2-1 den play-off semi-final
WILLEMSTAD- Santa Rosa Indians ku tremendo picheo atrobe di Jordan Lucas ta dal Royal Scorpions duru ku skor di 9-1 den wega number 3 di play-off semi-final entre number 1 i number 4. Ku e viktoria aki Santa Rosa ta dilanti den e seri 2-1 i Royal Scorpions ta lomba kontra muraya. Jordan Lucas picher habridó di Santa Rosa a tira 7 inning kompletu, 83 lansamentu sin tuma kareda pa bai ku e viktoria. Rochendrik Alexander tabatin un tremendo aktuashon na bate bayendo di 5-3 ku homerun i 4 kareda empuhá. Cerilio Soleana a habri pa Royal Scorpions i no tabatin su mihó anochi. Ela tira 5 inning, tuma 7 hit i 6 kareda di kual 5 tabata kareda limpi. Otro pichernan ku a tira pa Santa Rosa tabata Rowently Windster (0.1 inning), Cezan Rafaela (0.2 inning) i Hershelon Juliana 1.0 inning. Cezan Rafaela a tuma e úniko kareda di Royal Scorpions.
E siguiente wega entre e dos ekiponan aki lo ta djamars 22 di sèptèmber den Tio Daou Ballpark. Djaluna anochi ekiponan Santa Maria i Wild Cats lo enfrentá otro ku e seri empatá na 1. Por spera Jair Jurrjens pa Wild Cats kontra di Nemerson Angela atrobe, manera tabata e kaso den wega number 1 di e seri semi-final di e ekiponan djaweps último.
NUMERITONAN
Santa Rosa a nota 9 kareda, bati 15 hit i hasi 1 eror. Jordan Lucas tabata e picher ganadó. Rochendrik Alexander a bati di 5-3. Jurgen Statie a bati di 3-2. Aldair Daal, Shakir Albert i Shane Quant a bati di 5-2. Rochendrik Alexander a dal un homerun. Royal Scorpions a nota un kareda, bati 7 hit i hunga sin eror. Cerilio Soleana tabata e picher pèrdèdó. Sherivyen Newton a bati di 2-2. Raywendley van Gurp i Edinho Meyer a bati di 4-2.
