Santa Rosa Indians ta eliminá Royal Scorpions ganando 9 pa 5

WILLEMSTAD- Santa Rosa Indians ku bon picheo atrobe di Jordan Lucas i bateo oportuno, ta dal e gran faborito Royal Scorpions ku skor di 9 pa 5 djaweps anochi den Tio Daou Ballpark. Ku e viktoria aki Santa Rosa Indians lo bai final i lo topa e ganadó di e wega di djabièrnè anochi entre Wild Cats i Santa Maria. Royal Scorpions ta keda eliminá. Santa Rosa a bai dilanti 4-0 den promé inning riba homerun di 3 kareda di Shakir Albert i homerun ku base bashi di Christopher Pietersz (back to back). Tur dos bataso tabata homerunnan deskomunal pa leftfield. Jordan Lucas a tira 5 inning, tuma 4 hit i 3 kareda pa bira e picher ganadó. Ela risibí relevo Marvin Ludowika ku a tira 2 inning, Hershelon Juliana no a logra saka out i e sorpresa grandi ku ta Swindley Lint ku a tira 2 inning sin tuma kareda ni hit pa tene Santa Rosa dilanti. Swindley Lint no a haña e wega salba, pero por bisa mas ku salba wega debí ku ela drenta ku Royal Scorpions atras 8-5 ku potensial kareda di empate na home plate.  

Jordan Lucas, grandi atrobe pa Santa Rosa i a sali player of the game. Ela gana dos di e tres weganan pa Santa Rosa den e play-off semi-final.

Pa Deporte Kòrsou i pa regla Swindley Lint mester haña e wega salba. Ela drenta ku koredó na segunda i tersera sin out ku e wega 8-5 i potensial kareda di empate na home plate. Lint a dominá Curtley Doran ku flai den teritorio foul pa kècher, Goeloe ku flai pa e mes (flai pa picher). Despues Lint a boliá Kirvin Moesquit riba konteo di 3-2. Ku base yen e picher Swindley Lint a dominá Dennis Gustina ku flai pa sènter.  Santa Rosa a ampliá i hasi e wega 9-5 riba eror di rightfielder di Royal Scorpions den di 8 inning.  Den di 9 inning Swindley Lint ta dominá e batiadónan Kevin Moesquit, Raywendly van Gurp i Edinho Meyer 1,2,3 pa terminá e wega.  Santa Rosa a selebrá formal riba tereno sin fanátiko despues ku e wega a termina.

Swindley Lint den gran forma komo relevista djaweps pa Santa Rosa. 2 inning kontra grandinan di Royal Scorpions sin permiti nada. 0 kareda, 0 hit, 1 base por bola.
Dos dje grandinan di ayeranochi Christopher Pietersz i Shakir Albert. Nan a dal homerun ayeranochi pa bai dilanti for di den promé inning 4-0.

NUMERITONAN
Santa Rosa a skor na 9 okashon, bati 11 hit i kometé 1 eror. Jordan Lucas tabata e picher ganadó. Yegvanni Reinita a bati di 3-3. Aldair Daal, Shakir Albert i Christopher Pietersz a bati di 5-2.  Shakir Albert i Christopher Pietersz a dal un homerun.
Royal Scorpions a skor na 5 okashon, bati 7 hit i hasi 4 eror. Shurandy Valeriano a resultá e picher pèrdèdó. Ela tira 4.2 inning i tuma 7 kareda, Cerilio Soleana a tira 4.1 inning i tuma dos kareda di kual unu tabata shushi.  Edinho Meyer a bati di 5-3 ku 2 homerun.