Santa Rosa Memories ku unifòrm nobo
WILLEMSTAD- Resientemente e ekipo di Beisbòl Veterano Santa Rosa Memories den presensia di algun miembro di direktiva, a presentá i boutisá nan unifòrm nobo. E boutiso a tuma lugá na Saltwater Rif Terrace Koredor. Presente tabata tambe e dos spònsernan di e ekipo ku ta sra Faina propetaria di Saltwater Rif Terrace i sr. Barbolina propetario di Gai Lihe Service Center. E ekipo tin mas ku 17 aña den Beisbòl Veterano i a bira kampion na 2005, 2006 i 2009. Nos tin algun pòtrèt di e akto ku a tuma lugá na Saltwater Rif Terrace Koredor.
MAS INFORMASHON DI BEISBÒL I SÒFTBÒL
Liga 60 ta programá pa start dia 22 di mei na Frank Curiel Ballpark. Manera ya ta konosí, un ekipo nobo, Pitufos lo djoin e liga i ya nan a demostrá klase i bira kampion den e promé torneo ku nan a partisipá. E aña aki lo tin 8 ekipo den Liga 50, e kampionnan Nos Tambe Por, Jaws, Lions, Los Amigos, Nos Power, Cruacao Super Stars, Mon Repos Sluggers i Pitufos. Pitufos tin mas hungadó di kaliber na kaminda. Nan tabata fuerte ku hungadónan manera Ruvio Kook, Bufe Petronilia, Rudsel Petronilia, Naai Hooi, Wendell Sint Jago, Luis Coffie, Gachi Zimmerman, Randall ‘Ge’ Constancia I hopi mas. Pitufos 50+ a manera kai un tiki awor ku a lanta 60+. Pabien na Wendell Sint Jago, kabayero ku a kaba di kumpli 61 aña. Nos a tende ku Wendell ta bahando ku penshun bon meresí. Un dje gran kabayeronan di deporte na Kòrsou.
• * * * * *
Ban pa Little League un ratu. Preparashonnan ta sigi pa dos selekshon di Little League move pa Punta Cana di 5 pa 10 di yüli. Tin indikashon ku lo bai tin transmishon bibu i dirèkt for di Punta Cana. Extra Deporte ta evaluando i lo tin mas grupo ku interes pa transmití. Parse ku selekshon di Liga Pariba lo tabata muchu mas fuerte ku algun hungadó lo tabata adén. Manera ta konosi a surgi un malkompron-dementu i 5 hungadó estelarísimo a kai afó. Despues 1 a bini bèk i 4 no a regresá. Ta kosnan ku por a keda atendé muchu mas mihó ku sintamentu na mesa i papia.
•
• * * * * *
Intermediate a ranka sali na Sabana Ballpark ku kampionatonan entre Pariba, Pabou i Liga Willemstad. E kampionato di Intermediate Latino ta na Kòrsou ku partisipashon di varios païs. Chèns tei ku por yega te 10 ekipo ku e dos selekshonnan di Kòrsou adén. Interes semper ta grandi den païsnan den region pa bishitá Kòrsou i District Administrator a splika un ke otro na varios okashon. Little League na Kòrsou ta keda algu grandi i ta hala masha hopi fanátiko espeshalmente durante play-off. Ban spera ku otro aña fanátikonan lo komportá mas mihó. Nos ta keda te aki pa awe.
