Seis umpire nobo ta fortalese Curaçao Little League despues di kompletá Kurso pa Desaroya Umpire
WILLEMSTAD – Curaçao Little League ta hopi orguyoso riba e seis partisipantenan ku a kompletá kurso asina yama Little League Umpire Development Course ku éksito. Ta un programa intensivo di entrenamentu destiná pa prepará umpirenan pa kanta weganan di Little League ku profesionalismo, imparsiabilidat i integridat.
Durante un seremonia spesial ku a tuma lugá resentiemente na RBC Royal Bank na Rooi Catootje, e siguiente graduadonan a risibí nan sertifikado ofisial:
1. Jeremy Lucas
2. Jayden Elizabeth
3. Migel-Angello Schoop
4. Nathan Nahr
5. Marie-Belle Willems
6. Gregor Un
E kurso tabata dirigí dor di Sandley Martina, Umpire in Chief di Curaçao Little League, kende a kompartí su amplio eksperensha i konosementu pa prepará e grupo pa e responsabilidat importante di sirbi komo umpire pa weganan di Little League Baseball i Softball.
Umpire ta un factor indispensabel den tur kompetensha di Little League. Nan ta garantisá ku tur wega ta desaroyá den un ambiente hustu, siguridat i respet, aplikando e reglanan di manera imparsial i promove balornan fundamental di Fair Play, Integridat, Deportividat i Respet.
District Administrator di Curaçao Little League, Urny Florán, a felisita e graduadonan i a duna nan un bon bini ofisial den e grupo di umpirenan sertifiká di Curaçao Little League.
Floran a bisa ku Little League ta masha orguyoso di e seis boluntarionan ku a asumí e reto di bira umpire. Nan ta kontribui enorme na desaroyo di nos hóbennan i na e futuro di Little League na Kòrsou. Sin umpire dediká no por tin kompetensha di kalidat.
Curaçao Little League a ekspresá su gratitut na Sandley Martina i e demas instruktornan pa nan liderato, dedikashon i kompromiso durante henter e trayekto di entrenamentu, ku a kontribuí na e éksito di e programa.
Un gradisimentu spesial ta bai na RBC Royal Bank i Ministerio di Enseñansa, Siensia, Kultura i Deporte (OWCS), pa nan sosten kontinuo den desaroyo di hóbennan i boluntario nan den deporte.
Ku e seis umpirenan nobo aki, Curaçao Little League ta sigui fortalesé su kuerpo di ofisialnan, segurando ku e organisashon ta prepará pa sigui brinda kompetensianan di nivel haltu i un ambiente hustu i deportivo pa tur mucha ku ta forma parti di Little League.
Pabien na tur graduadonan i bon bini na e famia di Curaçao Little League Umpires!
