Selekshon Aruba kontra Meksiko djarason 1’or den Mundial di Little League na Williamsport
WILLIAMSPORT – Selekshon di Little League lo hunga awe, djarason, 14 di ougùstùs 2024, pa 1’or pm kontra di Meksiko den e promé partido di Mundial di Little League na Williamsport. Por sigi e weganan via ESPN. E weganan di e parti internashonal lo tuma lugá den Volunteer Stadium. Ekiponan di USA lo hunga den Howard Lamade Stadium e stadionnan ta keda pega ku otro aya na e kompleho di Little League na Williamsport. Sigiente weganan ta dependé kua ekipo gana ets.
ARUBA
Selekshon Little League di Aruba kampion di Karibe di Beisbòl a prepará fuerte pa partisipá na e kampionato Mundial di Beisbòl Little na Williamsport. E kampionato lo ta di 14 pa 25 di ougùstùs. Nos tabatin kontakto ku Elwin Rincones ku ta manager di e ekipo di Aruba. Ela bisa nos ku nan a prepará fuerte pa hasi un bon papel na Williamsport. Manera ta konosí ekipo Aruba a gana República Dominicana ku skor di 2-0 den un tremendo final ku nos tabatin e honor di transmití ku Extra Digital ku a keda mirá pa 94.000 views, 2.100 komentario. Hopi usadó di Facebook ta sigi wak e wega aki konstant, debí ku nos ta mira ku e viewsnan ta subiendo ketu bai.
E selekshon a biaha djaweps 8 di ougùstùs i lo tei bèk djaluna 26 di ougùstùs. Selekshon di Aruba Little League a hunga wega di fogeo kontra di selekshon di Junior League di Aruba i a gana ku skor di 5-3. E ekipo ta liber di leshon i tur hungadó ta den gran forma rumbo pa Williamsport. Nos lo sigi e desaroyo di e selekshon di Aruba aki na Williamsport. Un eksperensia úniko pa e muchanan naturalmente, un eksperensia ku nan lo keda rekordá pa semper di nan bida. Tur hungadó di Little League lo ke yega ei naturalmente. Despues di 3 aña sigí Kòrsou lo mester wanta un ratu ku partisipashon na Williamsport.
