WILLEMSTAD.- Apesar ku Sint Vincent a propiná Kòrsou e derota di mas grandi den nos eksistensia kòrtiku (4-0 na 2012 i tin un rèkòrt di 2 ganá i 0 pèrdí kontra nos) i apesar ku Cuba a buska 11 hungadó ku ta hunga pafó di Cuba, nos ta kampion di Karibe, posishoná entre e 10 mihónan di CONCACAF. Kòrsou ta rankiá number 76 di mundu i mester por derotá tantu ‘Vincy Heat’ komo e ‘Leonnan di Karibe’, esta Sint Vincent i Cuba, respektivamente.
Nos ta habri nos ruta pa Mundial dia 25 di mart na kas kontra Sint Vincent i lo topa Cuba tres dia despues na Guatemala. Sint Vincent, number 168 riba ranking di FIFA no ta den su mihó momentu. Nan ta bin ku un ekipo basta hóben ku aksènt riba defensa, apesar ku nan dos mihó hungadónan ta den atake. Oalex Anderson, sentro delantero ku ta hunga riba di dos nivel na Merka pa Richmond Kicker i e veterano di 31 aña Cornelius Stewart ku a yega di hunga futbòl profeshonal na Canada i awor ta hunga na Maldivia. Su posishon preferí ta riba ala drechi den atake. E ta nan máksimo goliadó ku 18 gol den 51 wega internashonal.
Sint Vincent ta hunga hopi defensivo i komo isla Ingles ta hunga un futbòl físiko. Tur kos ta indiká ku e biaha aki ta ‘heru’ pa ‘Vincy Heat’.
Cuba si ta otro historia. Kontra Cuba tambe nos rèkòrt ta negativo: 0 ganá, 2 tablá i 1 pèrdí. Cuba, kampion di Karibe 2012 ta e promé pais di Karibe ku a bai un Mundial (1938). Ku 11 hungadó aktivo pafó di Cuba, e ‘Leonnan di Karibe’ ta spera pa entre otro a kosto di nos, bòns bèk den e grandinan di nos region. Cuba ta spera ku e legionarionan lo ta e solushon pa nan problemanan futbolístiko. E grupo aki ta wòrdu liderá pa Onel Hernández, di Norwich City, ekipo ku ta rumbo pa Liga Premier i ta komandá e tabla di posishon den Championship, di dos divishon Ingles kaminda Bacunanan tambe ta hunga.
Onel, e promé kubano pa hunga den Liga Premier normalmente ta den atake riba ala robes, pero probablemente den e selekshon kubano lo militá den bolante. E la nase na Cuba i a bai for di chikí Alemania kaminda e la hunga promé ku su pase pa Inglatera. E la militá ku mes ekipo den Liga Premier i ta nan piesa peligroso.
Cuba tin tambe tres hungadó riba di dos nivel na Brazil. E portero Sanchez, tambe Cutiño ku ta defensa sentral i Fernández, un veterano sentro delantero. Nan defensa probablemente lo ta formá pa hungadó ku ta hunga den ekstranheria. Banda di Cutiño, tin Piedra e otro defensa sentral ku ta hunga den e divishon superior na Guatemala pa Sanarate, Corrales, un linksback aktivo riba di dos nivel pa Tulsa na Merka i un talento hóben Vásquez ku ta militá riba di dos nivel na Spaña pa Navalcarnero.
Esaki ta hasi e defensa di Cuba nan línea mas fuerte. Den bolante, ku eksepshon di Hernández si e hunga medio kampo, no tin hungadó di nivel. Tur sobra ta hunga na Cuba kaminda e kampionato pa motibu di COVID tin un aña suspendé. Archeel Hernández si ta hunga na Santo Domingo kaminda e nivel ta abou. Nan mihó delantero Marcel Hernández, di Alajuelense di Costa Rica, no ta bin mas pa motibu di problema ku hustisia. Pero den Paradela un bolante ofensivo/delantero, ku tambe ta hunga den divishon máksimo na Costa Rica pa Santos de Guápiles, Reyes, sentro delantero di Real Sociedad na Honduras i e veterano di 37 aña Apezteguia ku ta hunga na San Marino, huntu ku Fernández, nan tin opshon den delantero.
Cuba ta mustra un wesu mas duru pa krak, pero nan desbentaha ta ku e hungadónan di afó, no ta akoplá i ta yega Cuba dos dia promé ku e promé kompromiso di dia 24 ku Guatemala. E hungadó kubano mes tin un aña sin hunga kompetensia. Riba papel nos tin mihó ekipo ku kalidat di Liga Premier i Eredivisie. Nos simpel opinion ta ku un 4-4-2 ta nos mihó opshon, pero natural ta Hiddink ta disidí.
Nos ekipo nashonal
Cuco Martina so ta sin ekipo, pero tin hopi eksperensia i ta mantené su kondishon. Pa e kontrinkantenan aki, e ta un opshon pa defensa sentral. No tin otro. Shermar Martina ku eksepshon di un wega siman pasá, tin 5 luna sin hunga bala. E úniko opshon ta pa hala Leandro den sentral, kaminda e la proba kaba di por hunga. Ku Juninho i Anita mei mei den bolante nos tin un kurason di bolante riba nivel di Liga Premier, kaminda ámbos a hunga.
Antonia ta den un bon temporada. Gorré a krese den divishon máksimo na Portugal i ta hinka energia den atake i ta yuda defendé. Van den Hurk ta téknikamente ábil i peligroso. E tin un bon pase, ta dribbel bon i ta tira ku tur dos pia. Apesar ku e tin ménos estatura ku Benschop i Janga, e tambe ta bon ku kabes. Janga ku Benschop tin mes nivel. Benschop ta hunga riba nivel mas haltu, pero otro for di Janga, no ta estelar.
Ku Hooi, De Nooijer, Nepomuceno, Bonevacia, Antonisse i La Paz riba banki, e banki ta bon pa e buèlta aki. Nos tin ku rema ku e remanan ku nos tin. Pero manera nos a bisa, si no bin refuerso, nos no por pretendé di por keda den e kareda di mundial. ‘Pantera Negra’, ban pa Kòrsou rumannan!!!.
Pa: Peppie Sulvaran.
