Selekshon di Futbòl di Kòrsou mester drecha algun posishon rumbo pa e sigiente buelta
WILLEMSTAD.- Nos ta bai drenta un fase krusial pa lokual ta trata selekshon di futbòl di Kòrsou. A gana di St. Vincent i Cuba i asina posishoná nos mes te ainda a base di diferensia di gol komo lider di grupo C. Realidat ta ku e dos ekiponan menshoná, posishoná na puestonan 167 i 181, respektivamente, riba ranking di FIFA, sigur no ta konta entre mihónan di CONCACAF. Kòrsou posishoná na puesto number 76 pa regla tabata faborito pa gana e weganan aki i esei a sosodé tambe.
E weganan ei no mester laga nos sera wowo pa e realidat ku ta warda nos ni tampoko pa e debilidatnan den e selekshon aktual. Den gol ku Eloy Room, Kòrsou tin un di e mihónan di CONCACAF. Eloy ta un kiper di riba línea ku bon sake den su pianan i ku eksperensia amplio den Eredivisie ulandes ku Vitesse, Go Ahead Eagles i PSV. Ku Vitesse e la gana kopa ulandes pará den gol, ku PSV e la bira kampion ulandes komo kiper suplente i temporada pasá e la bira kampion di Merka ku Columbus Crew. Na e puesto ei nos ta hopi fuerte. Esei no ta konta pa e defensa su dilanti.
Kontra St. Vincent i Cuba nos por a presta pa presentá ku dos defensa sentral Cuco Martina i Suently Alberto kendenan huntu awor na yüni lo tin 37 luna sin hunga bala organisá. Pero si ta Mundial nos ta pretendé di yega, kontr’i kontrinkantenan ku ta pertenesé na tòp di CONCACAF, un kos asina no ta posibel. Kisas Darryl Lachman ku ta aktivo riba nivel máksimo na Oustralia por ta un solushon pa un di e dos puestonan ei.
Jurien Gaari ku ta suplente den RKC, te ainda ta e mihó kandidato pa e puesto di rèksbèk. E no ta haña hopi minüt di wega, pero ta entrená diariamente. No tin otro aworakí. E puesto di defensa riba ala robes ta mustra di ta di Michael Maria di NAC, ku defensivamente no ta fuerte, pero tin un bon téknika i por duna un bon kruse. E ta hunga riba e di dos nivel ulandes i tin ritmo di wega. Gevaro Nepomuceno tambe sa purba na e puesto ei, pero Gevaro ta mas un delantero. Riba banki no tin niun defensa ku ta hunga riba e nivel máksimo.
Den bolante nos por ta korto. Ta nos línea di mas fuerte i ku e dos yunan di John Bacuna i Vurnon Anita kendenan tur tin eksperensia di Liga Premier Ingles, bo por presentá tur kaminda. Tur tres ta bin di un bon temporada tambe. Solamente e posishonamentu di Juninho komo un sorto di linksbuiten falsu no ta lógiko. Su posishon na Inglatera semper ta bolante sentral kaminda e tin mas rendimentu. Anita ta e tipo di hungadó ku no ta ekselá, pero ta sera tur buraku pa otronan por bria. Leandro no mester di niun introdukshon i ta e motor di selekshon.
Den atake Jarchinio Antonia a kaba di yuda su ekipo Cambuur promové pa Eredivisie i ta den gran forma. Su velosidat ta un peliger real pa tur defensa. Ku Brandley Kuwas aserka, e alanan ta bon okupá i di nivel. Te ainda nos no tin un sentro delantero fiho. E bataya entre Charlison Benschop, Anthony van den Hurk i Rangelo Janga ta hopi pareu, ku Benschop ku un leve bentaha, pa motibu ku e tin mas velosidat, mas forsa i ta bon den kòp i ademas ta hunga riba un nivel poko mas haltu. E banki ta débil ku hungadónan ku ta hunga riba di dos nivel òf mas abou.
Refuerso ta indispensabel pa por yega i kompetí den e lastu ocho paisnan. Nos mester por Guatemala na kas i kisas Panamá ku no ta pasando den su mihó tempu, pero ku ainda ta por lo ménos di mes nivel ku nos. ‘Los Canaleros’ lo bira un wesu hopi duru pa krak. Un defensa sentral òf preferibel dos i por lo ménos un defensa lateral ta un mester. Un bolante di nivel pa por si akaso algu pasa un di e Bacunanan òf Anita, tambe ta bon pa agregá. Roly Bonevacia ku normalmente lo ta kandidato tin kuater luna sin ekipo i lo falta ritmo di wega. Un goliadó nato tambe ta un mester. Awor aki Nigel Robertha ku ta hunga na Merka pa DC United ta e mihó kandidato. E pregunta ta si Hiddink lo por konvensé òf si e lo hasi esfuerso pa konvensé, paso te ainda apesar di su nòmber, e no a logra konvensé niun hungadó di nivel, sero.
Un be mas, nos ta kontentu ku ‘nos’ selekshon a sali for di e promé dos kontrinkantenan, pero awor kos ta bai sinta mes mes pa ‘Pantera Negra’ i pa ‘12’. Tur hende prepará pa sostené ‘Pantera Negra’ den yüni. Nan lo tin mester di nos sosten. Huntu nos por bira grandi. E soño pa yega ‘baki santu’ otro aña di niun manera no mag di kaba.
Pa: Peppie Sulvaran.
