Selekshon di Futbòl di Kòrsou number 76 riba ranking vs Virgin Island dia 5 i Guatemela dia 8 di yüni
Skibi pa Pepi Sulvaran
WILLEMSTAD.- Otro luna, esta yüni, lo ta krusial pa nos selekshon nashonal di futbòl. Den apénas 10 dia nos lo por tin kuater wega di klasifikashon pa Mundial 2022. Dia 5 kontra Islanan Vírgen Britániko na Siudat di Guatemala, situá na 1500 meter riba nivel di laman, siguí tres dia despues pa e wega na kas kontra Guatemala, ku probablemente lo bira e wega desisivo pa saka e ganador di grupo C.
Riba papel, Kòrsou posishoná na number 76 riba ranking di FIFA, mester por sali tantu for di e number 208 komo e number 127 di mundu. Si nos logra gana nos grupo C, e ganadó di grupo D ta warda nos riba e dianan 12 i 15 di yüni. Apesar ku nos selekshon no ta pasando den su mihó momentu, ku algun hungadó ku por ta klave sin ekipo òf no titular den nan ekipo, nos mester uni tras di nos elenko nashonal pa por yega i enfrentá e ganadó di grupo D, ku lo ta Panamá òf Santo Domingo, pa asina alkansá e crème de la crème di CONCACAF i batayá ku e mihó ocho paisnan di nos region pa un kupo na Qatar 2022.
Sin importá ken lo ta na mando di e selekshon otro luna, nos tur mester duna nos sosten i apoyo inkondishonal, pasobra ta Kòrsou ta bai guera. Trankilidat rondó di e selekshon tambe ta importante. Nos tur tin mag di tin nos opinion paso ta fanátiko nos ta. Nos por tin internamente hasta desakuerdo, pero ora e momento yega pa enfrentá otronan, nos mester ta unu. Lokual si mester sosodé sin mas si nos ke sigui progresá, ta mas hungadó di nivel haltu. Nos tin sufisiente opshon, aunke tin diferente ku ainda ta soña irealístikamente ku selekshon hulandes.
Hiddink, aparentemente, no a logra konvensé niun te ainda. Den defensa tin e lateralnan Troupée (FC Utrecht), Floranus (Heerenveen) i Markelo (FC Twente). Floranus i Markelo por hunga sentral tambe. Den Feyenoord tin Malacia i Geertruida. Malacia tambe difísilmente ta bai yega Oranje. Si Geertruida, kende por hunga bèk sentral tambe, sigui progresá manera e ta bayendo, e si por tin un chèns pa yega na e puesto di lateral drechi, pero lo no ta fásil mirando e kompetensia. Pa un puesto sentral den defensa tin tambe Obispo (PSV) i St. Jago (FC Utrecht). Jurrien Timber (Ajax) si ta yegando selekshon ulandes. Pa bolante esnan alkansabel awor aki ta Quinten Timber (FC Utrecht) i Felida (FC Den Bosch), ámbos bolante defensivo. Pa atake, tin poko mas opshon. Robertha (DC United) ku a yega di bin un be kaba pòrnada bou di Bicentini, Locadia (Cincinnati), Chong ku na Bèlgika tampoko a logra bira estelar, pero ku sigur por yuda nos bon i Zivkovic (Chanchung Yatai). Ainda tin tambe esnan di un tiki ménos nivel, manera Kastaneer (Heart of Midlothian) i Cijntje (Waasland Beveren/Heracles) kendenan den pasado ya a wòrdu invitá.
Awor ku Bazoer (Vitesse) apesar di su mihó aña te ainda ni sikiera a wòrdu selekshoná den e pre selekshon hulandes di 33 hungadó pa Kampionato Europeo, kisas ta bon pa Patrick Kluivert tira un liña den su direkshon atrobe. E por move komo defensa sentral i den medio kampo. Nos ta komprondé ku lo tin algun ku nan soño pa alkansá selekshon hulandes, pero si te ainda nos no a logra konvensé ni un di nan, mester tin algu ku no ta bai bon.
Di tur manera nos ta spera ku pa yüni lo konvensé maske ta dos òf tres di nan. Pasobra ku Room, Leandro i Juninho Bacuna, Anita, Kuwas, Antonia i un Benschop den forma, reforsá ku tres pa kuater di esnan menshoná di e máksimo nivel profeshonal, nos tambe tin mag di soña, pero ku Mundial. Reforsá e defensa sigur ta un mester si nos ke tin chèns pa yega leu den e Pre Mundial aki. E bolante ta mustra stabil i ku eksperensia. E parti ofensivo tambe tin e nivel pa CONCACAF. Pa e weganan kontra Guatemala i eventual Panamá òf Santo Domingo na kas, lokual nos komo ‘12’ por i mester hasi, si ta permití fanátiko, ta yena ‘Ergilio Hato’ lata lata. Nos selekshon mester sinti ku e pueblo semper ta kuné. Asina ta, kuminsá reservá e fecha di 8 di yüni 2021 pa apoyá bo selekshon den su afan pa yega e oktagonal di CONCACAF.
Otro luna selekshon tin ku saka kara di nos patria òf muri na kaminda den su afan pa yega e oktagonal ku tin ku hiba nos Qatar. Ke men den e sentido ei pa ‘Pantera Negra’ e luna ku ta bin aki ta ‘patria o muerte’.
