Selekshon di Futbòl Kòrsou falta Virgin Islands i Guatemala
Skibi pa Pepi Sulvaran
WILLEMSTAD.- Aki un luna i algu e promé buèlta klasifikatorio pa Mundial pa e region di CONCACAF ta yega su kulminashon ku algun wega krusial i interesante, manera Canada kontra di Sürnam i Panamá v/s Santo Domingo. E lastu wega aki, ku tur probabilidat lo saka nos rival pa e próksimo buèlta di klasifikashon. Pa nos ta importante ku dia 8 di yüni Kòrsou ta topa den nos kueba na Brievengat ku ‘Los Chapines’ di Guatemala.
Despues ku nos sali for di Islanan Bírgen Ingles tres dia promé, esaki lo bira e wega di klasifikashon den grupo C pa por alkansá e siguiente buèlta. Nos pueblo en general i e fanatikada di futbòl en partikular konosí komo tambe komo ‘nos ta 12’ tin ku sostené nos selekshon tur tur. Yüni ta bira krusial. Pasó si nos sali di porta grandi for di Grupo C kaminda tur kos ta indiká ku un empate kontra Guatemala mirando nos diferensia di gol lo por ta sufisiente – apesar ku futbòl ta wòrdu hungá pa gana – nos lo topa Panamá òf kisas Rep. Dominicana komo lider di grupo D.
E weganan den e siguiente ronda ta riba e fechanan 12 i 15 di yüni 2021, ku ta wòrdu hungá den un ida i buèlta, lo ta nos pasaporte pa e lastu ocho ekiponan. Dikon esei ta importante pa nos? Nos tin ku sali for di e punto di bista ku Hiddink no tin e abilidat pa kombensí mas hungadó di nivel pa nos. Si e no a logra esei den 6 luna, esei probablemente no ta bai sosodé mas. Drentando den e lastu buèlta preliminar pa Mundial 2022 huntu ku paisnan mundialista manera Mexico, Merka, Jamaica, Costa Rica i Honduras, nos lo ta den e grandinan di nos region. Esaki ta hasi muchu mas atraktivo pa hungadónan ku ainda di forma irealístiko ta soña ku selekshon hulandes, pa djòin nos selekshon.
E último buèlta aki ku e mihónan di CONCACAF, indudablemente lo haña kobertura mundial i esaki pa hungadónan profeshonal i nan agentenan outomátikamente ta nifiká ku e hungadó no solamente ta haña kobertura internashonal, pero e agentenan tambe ta kuminsá mira señalnan di dòler i lo enkurashá e hungadó mas fásil pa presentá riba e podio aki i demostrá su habilidatnan ku kobertura mundial. Esei ta deporte profeshonal awendia, e parti finansiero semper por hunga un papel. Esei ta un realidat.
Na e momentu aki mínimo dos bèk sentral, un pia di half i un delantero goliadó, ta un mester si nos ke pretendé di tin un chèns den e lastu etapa di 8 di CONCACAF. No por stèns riba Hiddink pa esaki. Selekshon ta di nos di Kòrsou, ta ‘nos ta 12’. Hiddink lo bai un dia meskos ku el a bin, pero nos si lo tei te na morto. P’esei mester duna selekshon tur sosten na yüni benidero, irespekto kiko otronan hasi òf laga di hasi.
Nos amor pa tur lokual ta Kòrsou, semper mester ta inkondishonal. Nos ta spera ku pa kuminsamentu di yüni tur kos ku e pandemia aki ta asina leu, ku nos por yena e kueba na Brievengat di ‘bote en bote’ esta ‘rand rand’ pa asina nos krea un ambiente deportivo, pero hostil pa tur kontrinkante. Ku e selekshon aki mesora tambe nos por hasi algu na ‘nation building’ den e tempu difísil aki, komo un di e poko kosnan ku berdaderamente ta uni no; deporte ku patria ta unu!
P’esei ta imperativo pa kuminsá enbolbí mas tantu e ‘12’ komo tambe prensa lokal ku ‘nos’ selekshon. Huntu so nos por yega na e meta ku nos tur ta soña, esta di bira e pais mas chikitu ku hamas a toka shelu di futbòl. Nos tur mester di otro den esaki i mester profeshonalisá tur kos ku tin di aber ku selekshon. Si Hiddink no por trese hungadó, anto mester embolbí tambe gran futbolistanan di nos den e afan pa konvensé e hopi muchanan ku nos tin riba e máksimo nivel di futbòl. Leroy Fer, Vurnon Anita, Hedwiges Maduro, Jetro Willems etc. Nan ta para mas serka di e generashon aktivo i ta alabes ehèmpelnan ku selekshon hulandes no solamente ta difísil pa yega, pero mas aun tambe pa mantené bo posishon den ‘Oranje’. Mayoria di hungadónan aktivo, e nòmber Hiddink no ta bisa nan nada. Of nan no a nase ainda òf tabata kana den bruki tempu Hiddink tabatin éksito. Lo ta bon si pa pone for di awor un entrenadó hóben huntu ku Hiddink manera tabata e idea ku Hedwiges Maduro, un eks internashonal hulandes ku un trayekto den entre otro Ajax i Valencia di Spaña. Hiddink ku su 75 aña kisas no tin e energia pa biaha i bai papia personal ku kandidatonan. Esei ta un mester si nos ke konvensé nan. Anto esei mester sosodé promé ku e buèlta di 8 ku ta programa pa kuminsá sèptèmber awor. ‘Nos ta 12’ tambe mester ta ‘ready ready’ pa yüni.
