Swift a dal Yoyo Power den final i bira kampion di Kopa ABC&S
ORANJESTAD – Swift, ku un tremendo bateo i picheo, a gana di Yoyo Power di Aruba ku skor di 12-1 i bira kampion di Kopa ABC&S. Esaki ta di 2 biaha siguí i di 15 biaha den historia ku Swift ta bira kampion di e Kopa ABC&S. Swift a pèrdè nan promé wega ku skor di 6-5 kontra di Redskins, pero despues di esei, e tim no a pèrdè ni un wega mas den e torneo.
Swift a gana su weganan, 7-6 di Super Stars, 12-6 di Crush Power, 11-4 di Crushers, 11-3 kontra Happy Brothers den semifinal, i finalmente 12-1 den e gran final. Despues di e partido a tuma lugá e entrega di premionan. Alexander Rodriguez a bira MVP di e final di Kopa ABC&S. E weganan di semifinal i final a tuma lugá djadumingu 17 di mei na e tereno di Kudawecha. E torneo a start djaweps 14 di mei i a terminá djadumingu 17 di mei.
•
WILLEMSTAD- Ban Serio a dal Jandoret Raiders ku skor di 14-4 djadumingu 17 di mei na Van Engelen Ballpark pa bira kampion Kopa ABC&S. Un públiko grandi tabata presente na e parke menshoná pa mira e wega finalísimo. Despues di wega tabatin entrega di premio. Un torneo super eksitoso ku a konta ku partisipashon di islanan Aruba, Boneiru, Kòrsou, Sint Eustatius i Sint Maarten. E torneo a start djaweps 14 di mei i terminá djadumingu 17 di mei. Ta di 4 biaha sigí ku Ban Serio ta bira kampion di Kopa ABC&S.
PREMIONAN
• Kampion: Ban Serio.
• Supkampion: Jandoret Raiders.
• Di tres lugá: Marlins.
• MVP final: Kelvin Winklaar (Ban Serio).
• Kampion bate: Rudy Baly, (8-7 .875)
• Lider di homerun: Melanio Albertus (2 homerun).
• Kampion picher: Tomas Beras.
Sòftbòl Femenino Fastpitch Dòbel A den antesala
Djabièrnè e promé wega final di Diamond Stars League i Treasure a gana
WILLEMSTAD – Djabièrnè 22 di mei tabatin e promé wega di e gran final di Diamond Stars League entre Rising Phoenix i Treasure. Treasure a gana e wega aki ku skor di 8 pa 2. Komo antesala i un regalo pa e fanátikonan, lo tin un wega amistoso entre Fenix i e ekipo di Souax. Fenix i Souax a terminá entre e promé tres timnan di e kampionato di Sòftbòl Femenino Dòbel A. Manera ta konosí, debí na un protesta, e kampionato di Sòftbòl Femenino Dòbel A a keda suspendé i te ku awe, 7 luna despues, no tin ningun moveshon pa loke ta trata e kategoria aki. Direktiva di Diamond Stars League a aserka e ekiponan menshoná pa hunga un antesala, pa asina por "jump start" e sòftbòl femenino Dòbel A i e otro liganan di fastpitch femenino, manera Klase A i Hubenil. E weganan entre Fenix i Souax lo ta djabièrnè pa 8:00 p.m. i djasabra pa 7:30 p.m. Mientrastantu, e weganan number 1 i 2 di e gran final di e liga lo hunga djabièrnè i djasabra pa 9:30 p.m.
MAS INFORMASHON DI SÒFTBÒL I BEISBÒL
Fanátikonan di Deporte Kòrsou, bon dia i felis wikènt! E fin di siman aki ta start awe ku un final kandela di Diamond Stars League entre e ekiponan Rising Phoenix i Treasure. E seri final aki lo tuma lugá na Sam Bunting Ballpark, kaminda e kampionato regular tambe a hunga.
Ayeranochi pa 9:30 p.m. djasabra tambe pa 9:30 p.m. lo tin e weganan number 1 i 2 di e seri final. Rising Phoenix, kampion di 2024 i 2025, ta gran faborito naturalmente. Probablemente Sport.cw lo transmití e weganan bibu i direkto via nan plataformanan. Liga 50 di Sòftbòl Maskulino ta sigui djasabra ku e di dos djasabra di e kampionato. Djasabra 10:00 a.m. tin kandela na momentu ku Baranka topa ku Ban Serio, i lo tin 3 wega. Di otro banda, Liga 60 ta start djadumingu awor na Frank Curiel Ballpark, i e parti ofishal kaminda lo honra baluartenan lo ta dia 31 di mei.
• * * * * *
Promé ku e weganan final di Diamond Stars League, lo tin weganan di Sòftbòl Femenino Fastpitch entre e ekiponan Fenix i Souax. Dos ekipo ku tabata hunga playoff den luna di òktober 2025, sperando un desishon di CSB den e kaso di e protesta i apelashon di Fenix kontra di Pitchingolo. Ban spera ku esaki lo ta un komienso pa e aktornan sinta na mesa i yega na un solushon pa sòftbòl femenino fastpitch ku ta mal pegá. E weganan ta djabièrnè pa 8:00 p.m. i djasabra pa 7:30 p.m. na Sam Bunting Ballpark. Naturalmente, ku e fanátikonan ku ta bai wak fastpitch kombiná ku esnan di femenino veterano, lo tin hopi fanátiko na Sam Bunting Ballpark. Vários hungadó ku ta hunga den veterano ku ta aktivo ainda den Sòftbòl Femenino Fastpitch.
• * * * * *
Miéntras tantu, Swift, Cicoza i Terremoto ta bèk na Kòrsou, i nada pa e hòbenan aki move durante e temporada. Tin mobilisashon pa start ku un liga pa e hòbenan aki na Kòrsou. Torneonan soshal sí ta moviendo aki aya. Naturalmente Liga 50 i 60 ta moviendo i Béisbol Veterano tambe ta pendiente pa start. E kampionato di Béisbol Dòbel A a sigui djamars anochi, despues di un break pa Dia di Asenshon, ku e partido kaminda Santa Maria Pirates a gana Santa Rosa Indians. Santa Maria a gana ku skor di 3-2, pero nan a kometé 4 eror i asina mes a gana tòg.
Varios hòben tabata den akshon pa e dos ekiponan. Di Santa Rosa nos a mira e prospektonan Ayden Calmes i Zhydire Joubert den akshon. Jordan Lucas tabata e picher pèrdèdó pa Santa Rosa, miéntras ku Zairich Daal a bolbe gana pa Santa Maria Pirates. Ayera, djaweps 21 di mei, mester tabatin e wega entre Wild Cats i Royal Scorpions. Wild Cats a gana e promé wega di e kampionato den e promé buelta.
Pa loke ta e Standing di Béisbol Dobel A promé ku e wega di djaweps: Santa Maria: 4-0, Groot Kwartier Stars: 2-1, Santa Rosa Indians: 1-2, Wild Cats: 1-2, Royal Scorpions: 0-3 (den sótano) Den Klase A, e standing ta: Santa Maria Pirates: 4-0, Royal Scorpions: 1-1, Santa Rosa Indians: 1-2, Curaçao Giants: 0-3. Manera ta konosí, e ekipo di Groot Kwartier Stars a hala atras di Klase A i na su lugá a bini Curaçao Giants. Den Dòbel A, e ekipo di Marchena Braves a wanta un ratu pa loke ta trata partisipashon na e kampionato di Beisbòl Dòbel A, Klase A i Hubenil, i por bisa ku práktikamente e ekipo a stòp di eksistí. Pa loke ta e parti Hubenil (Rookie U-21): Santa Rosa Indians: 6-0, Santa Maria Pirates: 4-2, Royal Scorpions: 3-3, Wild Cats: 3-3, Groot Kwartier Astros: 1-5 Groot Kwartier Stars: 1-5. For di aña pasá, Groot Kwartier ta hunga ku dos tim den Hubenil, i nos no por komprendé kon bin Groot Kwartier Klase A a kai afó.
• * * * * * *
Beisbòl Veterano tin reunion general dia 3 di yüni pa 7:30 p.m. na SSK. Dia 5 di yüni ta e úlimo dia pa traspaso, i dia 12 di yüni ta e último dia pa entrega e lista di hungadónan. Dia 17 di yüni e listanan ta keda publiká, pa asina dia 20 di yüni e kampionato di Béisbol Veterano 2026 start. Den yüli tin pendiente un BBQ fundraising. Den Liga 50 tin un ekipo nobo, i no ta konosí ainda kon a para ku Yesterday, despues ku vários hungadó a move òf ta moviendo pa otro ekipo. Nos ta keda te aki pa awe, te djaluna ku Poder di Dios.
