NOS SELEKSHON TA KLA PA ENFRENTÁ JAMAICA AWE 10 DI ÒKTOBER RIBA DIA DI PAIS KÒRSOU! E TREMENDO PARTIDO AKI LO INISIÁ 7’OR DI ANOCHI DEN STADION ERGILIO HATO!
E DIA A YEGA!
WILLEMSTAD Awe (aworaki) 10 di òktober 2025 nos selekshon nashonal lo tin su terser partido di kualifikashon pa Mundial di FIFA! Awe riba un fecha spesial pa nos komo yunan di Kòrsou nos selekshon lo enfrentá Jamaica pa 7’or di anochi den Stadion Ergilio Hato.
Manera nos a anunsiá algun dia pasá e partido di awe ta ‘sold out’ i no tin mas karchi disponibel na niun punto di benta ni na porta. Portanan di stadion ta habri for di 5’or di atardi, pues yega trempan pa evitá tráfiko i stagnashon na porta.
Kada sekshon lo tin nan propio entrada i tin vários bòrchi ku indikashon di e entradanan di kada un di e sekshonnan aki. E biaha aki tambe tin e opshon pa stashoná outo na Crefona i Industriepark kaminda lo bai tin bùsnan ku ta transportá tur nos fanátikonan pa stadion. E bùsnan aki lo kuminsá transportá hende for di 5’or di atardi i lo keda kore te ora wega finalisá.
Pa esnan ku ainda no tin nan blous por pasa tuma esaki for di 2’or di atardi na FFK i kumpra bo karchi pa djamars binidero, ora nos selekshon topa Trininad & Tobago 7’or den Stadion Ergilio Hato!
Danki na pueblo di Kòrsou kompletu pa e sosten i apoyo pa nos selekshon. Ban kanta, grita, animá, waya bo bandera i demostrá mundu kompletu kon patriótiko nos komo yunan di Kòrsou por ta!
Nos ta topa aki ratu den stadion, ban p’e ku fe.
