Selekshon di Sòftbòl Femenino a keda na di 3 lugá i lo yega djadumingu 12 di yüni pa 5’or pm
WILLEMSTAD- Nos selekshon Femenino di Sòftbol di Kòrsou a termina number 3 i gana medaya di bròns. Nan lo yega Kòrsou awe, djadumingu 12 di yüni pa 5’or pm. Nos a risibi un komunikado di Curacao Softball Bond djasabra anochi.
“Despues di un partisipashon meritorio na e kampionato Sur Amerikano di sòftbòl femenino señor, nos selekshon patrosiná pa MCB i FDOK a logra gana medaya di bròns. Nos selekshon a konsistí di 10 miembro nobo ku pa promé bia a forma parti di selekshon di Kòrsou. Djabièrnè nos a gana di Perú pa ‘knock out’ 7 pa 1 segurando e medaya di bròns. E sirkunstansia na tereno a afektá mayoria di nos muchanan, un stòf fini tabata supla kombiná ku e frieu e pone ku e muchanan a lanta malu djasabra. Apesar di esei nos a bai kara na laria kontra di Argentina , finalmente den un wega bon bringa nos a kai vensí 3 pa 1.
Den premionan individual, Joanna Benita a resultá e mihó primera base di e torneo. J'DAH Girigorie ta e picher ku e miho ERA di e torneo, un era di 1.050 Nos ta masha orguyoso di nos muchanan ku a lucha balente kontra di rivalnan fuerte di Sur Amérika. Pa motibu aki nos ke invitá pueblo di Kòrsou pa bin risibí nos muchanan djadumingu 12 di yüni 5or di atardi ora nan regresá bek di Argentina. Laga nan sinti ku nos ta apresiá nan bon trabou.”
