Selekshon Minor kampion Latino Americano i mas informashon di Beisbòl i Sòftbòl
MAYAGUEZ - Selekshon Liga Pariba a bira kampion Latino Americano djasabra mèrdia na Mayaguez (Puerto Rico). E selekshon di Pariba a gana República Dominicana ku skor di 5 pa 4. Den e último inning den bòm di e di 6 inning, Kòrsou tabata pèrdí ku skor di 4-0 ku e picher habridó di República Dominicana pichando. Na momentu ku e picher habridó a sali for di wega despues ku ela yega e kantidat di lansamentu, Kòrsou a habri afó i nota 5 kareda. Kòrsou a terminá e kampionato Latino ku a konta ku partisipashon di 10 pais, komo invikto, ganando 4 wega den buelta regular i dos den play-off. Xhaiff Franken a dal e hit pa empatá e wega i despues Raylan Hosepha a dal e hit pa Kòrsou gana e wega.
Ta di 4 selekshon di Kòrsou di Beisbòl Little League ku ta bira kampion di e kampionatonan regional. Selekshon Little a bira kampion di Karibe, selekshonnan Intermediate, Junor i Minor tambe a bira kampion Latino Americano.
Djadumingu Minister di Deporte, District Administrator i spònsernan tabata presente pa risibí e selekshon na aeropuerto. Bon públiko a presentá na aeropuerto pa risibí e selekshon. E selekshon a drenta bus na aeropuerto i move den kayanan di Kòrsou i bai selebrá na Ricardo Elhage Ballpark na Zapateer, kaminda tabatin hopi fanátiko pa selebrá i kombersá ku e hóbennan i dirigentenan.
Un pabien na Minor Liga Pariba, e hóbennan di selekshon i nan dirigentenan.
INFORMASHON DI BEISBÒL I SÒFTBÒL
Fanáٲtikonan di Deporte Kòrsou, bonochi. Pabien na selekshon di Minor League di Pariba ku a bira kampion di Latino Americano na Mayaguez, Puerto Rico. Kòrsou a gana selekshon di República Dominicana ku skor di 5-4. Nan tabata atras ku skor di 4-0 den último inning i ta nota 5 kareda den último inning pa bòltu skor i bira kampion. Videonan masha emoshonante tabata kore riba retnan soshal djasabra mèrdia. Pa promé biaha den historia Kòrosu ta bira kampion den 4 divishon. Ironía ta ku e tim ku tabata mustra mas sólido ku ta Senior Pabou no a logra yega final pa bira kampion. Esei ta Beisbòl, esei ta deporte, ta riba tereno e wega mester keda hungá.
* * * * *
Awor nos tin 6 kampion riba nivel Latino / Karibe. 4 di Beisbòl i 2 di Sòftbòl. 5 ekipo lo bai Mundial i ta riba nivel Minor so no tin kampionato Mundial. Straño ta ku den Minor tabatin mas partisipashon di ekiponan. 10 ekipo a partisipá den e kampionato Latino di Minor. Den Pul A tabatin Guayama, Honduras, Panama, Meksiko i República Dominicana. Den Pul B tabatin Mayaguez, Kòrsou, Nicaragua, Chole i Virgin Island. Praktikamente niun di e kampionatonan otro no a pasa 7 ekipo. Nos a tep e ekipo di Pariba aki komo un dje grandinan pa yega leu mirando kon nan a hunga den e play-off kontra di Pabou. Pabien na manager Swindley Lint ku ta un tremendo coach. Pabien na henter e delegashon enkabesá pa Oswin Lint i sra. Emmylou Jakoba.
* * * * *
Djadumingu e selekshon a yega Kòrsou bèk i tabatin un públiko grandi pa risibí nan na aeropuerto. Despues a sigi un rekorido den kayanan rumbo pa Ricardo Elhage Ballpark. Nan a selebrá en grande. Naturalmente na aeropuerto tabata presente Minister di Deporte, representantenan di RBC i District Administrator pa risibí e selekshon di e hóbennan di 9 i 10 aña. Djabièrnè nos a pone e fecha i sedenan di tur kampionato Mundial tantu riba nivel di Beisbòl komo riba nivel di Sòftbòl. Ku 5 tim sigur unu lo bini ku e título Mundial. Kòrsou grandi mes mes riba nivel di Little League regional.
* * * * *
Sorpresa a kai den Beisbòl Veterano djasabra na Vi Jansen Ballpark. Ekipo Vosama a gana di Santa Maria Pirates ku skor di 6 pa 3. E slengu Felix Ibañez tabata e picher ganadó pa e ekipo. Ela tira 4 inning i risibí 4 hit i 3 kareda limpi. Alberto Ramirez a relevá Ibañez. Tabata a promé wega di buelta number 2. Santa Maria tabatin rekòrt di 9-2 promé ku e wega di djasabra, miéntras Vosama tabatin rekòrt di 5-6. Ke mèn Santa Maria a bai 9-3 i Vosama 6-6. Den un wega di hopi kareda pero kandela den e parti final ekipo Santa Rosa a gana Azucar ku skor di 14-13. Santa Rosa tabata ganá ku skor di 14-4 te den último inning, pero Azucar ta nota 9 kareda i por poko a empatá e wega. E wega a bai 4 inning, ku dos out ainda Santa Rosa tabata ganá 14-8. Azucar a nota 5 kareda mas pa yega nèt na 13 kareda. E wega a terminá ku ponche kantá ku base yen. Den e último wega di djasabra Jandoret a gana Yesterday 7 pa 2 ku picheo di Fisel Pereira.
* * * * *
Den Liga 50 Lions a dal Artemisia ku skor di 7 pa 6. Catpower a sorprendé Pitufos ganando ku skor di 9 pa 7. Nonnie de Roon tabata e picher ganadó pa Catpower tirando henter e ruta. Pitufos tin algun hungadó ku ta hunga den 60+ ku ketu bai ta hasiendo e trabou den 50+ manera entre otro Richenel Juliana, Naai Hooi, Luis Coffie, Elston Constancia, Tyron Pitt ets. Flamboyan Tigers a laga Jaws den tereno ganando ku skor di 12-11. Flamboyan ta moviendo den gran forma den 2022 i tin rekòrt di 4 ganá i 1 pèrdí. Baranka ketu bai ta úniko ekipo invikto. Nan ta kampion di Sòftbòl 50+ di kampionato 2021 i kampion di Torneo Amstel Bright 2022 i kampion di Kopa ABC 50+ di 2022. Den Liga di Nos Tur, Un Kara a gana Chilling 12-6, Curacao Sweetheart a derotá Shining Stars 8 pa 5 djabièrnè. Djasabra Shining Stars a gana di Curacao Sweetheart 7 pa 6 i Sin Stress a dal Join Me 10 pa 5.
