Selekshon Sòftbòl Junior i Senior di Kòrsou kampion Latino Americano
SABANA GRANDE – Selekshon Junior i Senior di Liga Soraida Juliana a bira kampion di kampionato Latino di Sòftbòl djamars mèrdia na Sabana Grande (Puerto Rico). Gana den un final di Sòftbòl Little League kontra dos selekshon di Puerto Rico anto sigi riba mesun fecha, no ta nada fásil i ta algu históriko. Puerto Rico ta konosí komo super kampion di Sòftbòl riba nivel Little League. Den Junior Taynice Prince a tira tremendísimo pa blankia selekshon Junior di Puerto Rico 2-0.
Tishantely Elisabeth a dal hit imporante pa center pa empuhá kareda. Den Senior e sensashonal J’Dah Girigorie a tira wega kompletu i Sheveany Manuela a konektá hit di oro den bòm di e di 7 inning ku dos out pa Kòrsou Senior laga Puerto Rico den tereno ganando ku skor di 9-8. Kòrsou tabata ariba ku skor di 8-6 den e último inning, pero ku dos out Puerto Rico a rèli pa dos kareda. Den e bom di e di 7 inning Kòrsou a logra skor e kareda ku nan tabatin mester pa laga e ekipo di Puerto Rico den terneo. Despues di wega tabatin entrega di banderin na e dos selekshonan di Kòrsou ku a bira kampion. Selekshonnan a yega djarason atardi Kòrsou. Pabien na presidente Nikita i su crew, ku den su promé aña komo presidente di Liga Soraida Juliana a logra dos título pareu riba nivel Latino Americano na Puerto Rico.
NUMERITONAN SENIOR
Kòrsou a nota 9 kareda, dal 11 hit i hasi 1 eror. Puerto Rico a konektá 9 hit i hasi 3 eror. J’Dah tabata e picher ganadó pa Kòrsou. Sheyveany Manuela yu di presidente di Liga Soradia Juliana, Nikita Manuel, a dal hit di oro pa terminá e partido.
NUMERITONAN JUNIOR
Kòrsou a skor 2 kareda, konektá 3 hit i hunga sin eror. Taynice Prince tabata e picher ganadó.
Puerto Rico A (Maunabo) no a nota kareda. Nan a dal 4 hit i hasi 2 eror.
