KONOSE BO SELEKSHON: SHEREL FLORANUS I GIOVANNI TROUPÉE TA DOS DEFENSA LATERAL DI NIVEL.
Sera konosí ku Sherrel Floranus i Giovanni Troupée di Selekshon di Futbòl di Kòrsou
WILLEMSTAD - Tantu Floranus ku ta hunga den e divishon máksimo Turko ku Antalyaspor komo Troupée ku ta militá den Lokomotiv Plovdiv, tambe den e divishon mas haltu, pero na Bulgaria, ta dos rèksbèk ku sigur lo oumentá e konkurensia den defensa di nos selekshon. Nan trayekto a kore mas o menos paralelo. Ambos a wòrdu selektá pa e diferente selekshonnan hubenil hulandes. Manera tur nos selekshonadonan, nan tambe tin dòbel pasport futbòlistiko, nan por hunga pa tantu Kòrsou komo pa Ulanda. Meskos ku hopi di nos muchanan, nan tambe a warda un ratu riba e yamada pa ‘Oranje’ grandi, ku nunka a yega. Awor nan a mira e lus i a skohe pa bin yuda e pais di nan rais i nan mes tambe pa purba yega mundial 2026.
SHEREL FLORANUS
Sherel (24) ta mucha di Ròttò manera yu di Kòrsou sa yama Rotterdam i bisendario. Un área ku ta produsiendo hopi di nos muchanan, manera entre otro Lutsharel Geertruida, Tyrell Malacia, Quilindyschi Hartman, tur tres a kuminsá nan karera profeshonal den Feyenoord, pero tambe Cuco Martina, Rangelo Janga i Kevin Felida. Floranus ta produkto di e departamento hubenil di Sparta Rotterdam i a hunga den tur selekshon hubenil di KNVB for di U-16 te ku Jong Oranje.
Den su karera ela hunga na tur posishon den defensa. E tin mihó velosidat i ta defendé mihó ku Troupée. Awor ku selekshon pa straño ku por zona, no tin ningún defensor di pia robes, kaminda Jurich Carolina ta hunga tur siman den e divishon maksimo di Polonia, sea linksbèk of defensa central, Sherel ku ta skòp ku pia rèks, ta mustra sigur di e puesto riba ala robes den defensa di ‘Pantera Negra’. Na Turkia tambe e sa hunga na e puesto ei.
Den Sparta hasta e la yega di hunga komo sentral den defensa. Su velosidat i habilidat pa rekuperá ta hasi ku no ta fásil pa bai lage. E no tin un puesto di estelar ahinda den su ekipo, pero ta wordu postulá regular riba un di e dos puestonan riba ala den defensa i tambe komo bolante defensivo. E ta amigu di Tahith Chong for di den selekshonnan hubenil Hulandes ku nan a pasa aden huntu.
GIOVANNI TROUPÉE
Giovanni Troupée (25) a nase na Amsterdam for di un mama yu di Kòrsou. Na edat hoben, tantu Ajax, Feyenoord i PSV a mustra interes den dje, pero ela skohe pa FC Utrecht. E tambe a forma parti di tur selekshon Ulandes for di U-17 te ku U-20. Téknikamente e ta superior na Floranus i ta mihó ofensivamente. E tin mas ku 100 wega di eksperensia den Eredivisie Ulandes ku FC Utrecht, ADO i FC Twente.
For di mei aña pasa te ku desèmber e tabata sin ekipo i na yanüari di e aña aki ela firma ku e ekipo Bulgaro i mientras tantu después di un komienso slow pa motibu di leshon a bira estelar e último weganan. Meskos ku Floranus e tambe tin un mente luchadó i ta entregá tur kos riba tereno. E ta subi bon riba liña i tin un bon kruse for di riba ala. Saliendo for di e punto di bista ku Bicentini lo postula Cuco Martina mei mei den defensa, Troupée ku Floranus ku tambe tin 120 wega den Eredivisie ta e defensanan lateral ku mas eksperensia den wega grandi.
Ku Gaari (RKC) ku por hunga sentral tambe i e hobennan Markelo (Excelsior) i Chirino (PEC Zwolle) ku awor tur dos den Eredivisie i ku ta bati na porta, e konkurensia pa e puesto di rèksbèk ta pèrta. Troupée tin e eksperensia i e trankilidat komo bentaha. Ta bai bira interesante wak kon Bicentini ta bai hinka su defensa den otro. Ahinda tin Lachman (Perth Glory) komo un di e sentralnan. Si e wòrdu postula einan huntu ku Cuco (NAC), Gaari ku Troupée ta e miho kandidatonan pa defende e ala drechi den defensa, saliendo for di e punto di bista ku e banda robes ta di Floranus. Esei ta si mantené un formashon di kuater defensa manera ‘Pantera Negra’ sa hunga. Mirando ku nos lo bai enfrentá Jamaica i Merka den nos grupo di ‘Kopa di Oro’ si nos yega, kisas un defensa di 5 ta un mihó opshon i e ora ei si Gaari ku Troupée tur dos por wordu alinea. Nos lo bin riba esaki mas después.
