Seri final di Sòftbòl Liga 60+ entre Jaws i Pitufos ta start djadumingu 2’or na Frank Curiel Ballpark
WILLEMSTAD – Pitufos lo topa ku Jaws djadumingu awor 2’or den wega number 1 di playoff final 60+ den Frank Curiel Ballpark. Pitufos ku apénas dos aña den Sòftbòl Liga 60 a logra yega final despues ku nan a gana Nos Tambe Por den e seri entre number 1 number i 2 dos siman pasá.
Wega number 2 di e seri lo ta dia 17 di desèmber pa 1’or di mèrdia. Den kaso ku e seri final mihó di 3 aki empatá lo tin wega number 3 mesorá pa 3’or di mèrdia, djadumingu 17 di desember. Mirando ku práktikamente tur aktividat di Sòftbòl i Beisbòl Veterano ta bai terminá, ta spera un públiko grandi aya na Frank Curiel Ballpark kaminda tur wega di e seri final lo tuma lugá. Eksito na tur dos ekipo.
MAS INFORMASHON DI SÒFTBÒL I BEISBÒL
Fanátikonan di Deporte Kòrsou bon dia i felis fin di siman. Nos ta drenta un fin di siman kaminda lo start ku final di Liga 60 entre ekiponan Pitufos i Jaws. Ekipo PItufos a gana Nos Tambe Por i pasa dirèkt pa final dos siman pasá i wikènt pasá Jaws tambe a gana di Nos Tambe Por i pasa pa final. E final ta start djadumingu 2’or ku wega number 1 di e seri entre Jaws i Pitufos. Wega number dos lo ta dia 17 di desèmber pa 11’or i wega number 3 di e fecha ei ku ta wega finalísimo di e seri lo ta 3’or. E wega number 3 di e seri ta kai naturalmente si ta nesesario.
* * * * *
Weganan di Curacao Professional Baseball a sigi djarason, djaweps i djabièrnè na Tio Daou Ballpark. Djaarson ekipo Willemstad Cannons a gana di Curacao Goats ku skor di 13-6. Djaweps tabatin wega entre Curacao Goats kontra Curacao Suns. Suns a gana ku skor di 8-0. Djabièrnè Curacao Suns a gana Cannons ku skor di 9 pa 4 i klasifiká pa final. Djasabra Goats lo hunga kontra Cannons den semifinal i e ganado lo topa ku Curacao Suns den final . E kampionato a start djadumingu 3 di desèmber i lo terminá djadumingu 10 di desèmber. Grandinan manera Andrelton Simmons, Jonathan Schoop, Cedanne Rafaela ta partisipando den e kampionato i ta pendiente di mas strea i Big Leaguer. Djaweps Didi Gregorius a debutá ayera pa Curacao Goats.
%20copy.jpg)
* * * * *
Skema di Serie del Caribe a sali i Kòrsou lo hunga kasi tur wega den oranan di mainta. Djabièrnè 2 di febrüari Kòrsou kontra di Panama pa 10.30. Djasabra 3 di febrüari Kòrsou kontra di Venezuela 10.30. Djadumingu 5 di febrüari Nicaragua kontra Kòrsou pa 10.30. Djamars dia 6 Kòrsou kontra Republica Dominicana pa 10.30. Djarason 7 di febrüari Kòrsou vs Puerto Rico pa 10.30. Semi-finalnan ta djaweps dia 8 di febrüari pa 3’or i 8’or pm. Final ta djabièrnè dia 9 di febrüari pa 8’or i e wega bálido pa di 3 i di 4 lugá lo ta 3’or pm.
* * * * *
Nos ta bai analisá e final di 60+ entre Pitufos i Jaws un ratu. Pitufos a terminá na di dos lugá ku rèkòrt di 10 ganá i 4 pèrdí. Nan a gana Nos Tambe Por i pasa pa final dirèkt. Durante temporada regular nan a gana Jaws ku skor di 5-3 djadumingu 23 di yüli. Den e wega Anthony Pieter a gana pa Jaws i Janchi Cicilia a pèrdè pa Pitufos. Pèrdí ku skor di 3-2 den último inning ku dos hungadó na base i ku dos straik, Fransje Lambertina ta dal homerun kontra Janchi Cicilia pa laga ekipo Pitufos den tereno.
* * * * *
Den Buelta number dia 17 di sèptèmber Pitufos ku picheo kombiná di Janchi Cicilia i Lesley Martina a blankiá Jaws ganando ku skor di 5-0. Anthony Pieter tabata e picher pèrdèdó. Ke mèn den temporada regular kada ekipo a gana un wega. Pa loke ta trata sifranan kolektivo, Pitufos a bati pa average di .351 durante kampionato regular, nan picheo ku ERA di 3.41 i defensa di .940. Jaws a bati pa .356, nan ERA ta 4.92 i defensa ta .962. Ekipo Pitufos tin un ventaha leve apesar ku Jaws tin mas eksperensia di final. Ekipo Pitufos a start den 60+ aña 2022 i a bira kampion den e promé torneo ku nan a partisipá.
* * * * *
Pa mei mei di otro siman nos lo kuminsá ku resumen di tur loke a pasa den Sòftbòl Slowpitch i Beisbòl durante 2023. Manera ya a bira un tradishon nos ta pone énfasis riba ekiponan ku a bira kampion. Na algun okashon nos a skibi kaba ku e aña aki tabatin varios kampion nobo. Práktikamente Quality Stars i Baranka 40+ so a ripití komo kampion. Liga Van Engelen, Liga Amstel, Liga 50+ Sòftbòl i Liga 50+ Beisbòl a konosé kampion nobo. Liga di Nos Tur i The Diamond Stars League tambe tabatin kampion nobo.
* * * * *
Masha hopi torneo komersial durante 2023 i pa 2024 nos lo tei mas serka i dependé e espasio lo tin mas informashon. Fanátiko di Beisbòl, kòrda asistí i sostené e kampionato di Beisbòl Profeshonal di Kòrsou ku ta tumando lugá na Tio Daou Ballpark. Varios prospekto ku ta hunga profeshonal na USA, rònt Mundu i den Beisbòl di Hulanda tambe nan ta den akshon. Hopi hungadó di College i e mihónan di nos Beisbòl lokal tambe ta hungando. Nos ta keda te aki pa awe. Nos lo topa na Beisbòl i na Sòftbòl 60+ den wikènt benidero. Te djaluna ku Poder di Dios.
