Sithoc rumbo pa 80 aña i tei bèk den promé divishon pa keda
WILLEMSTAD-E ekipo di futbòl F.C. Sithoc a tene un konferensia di prensa djaluna último na edifisio di FFK na Brievengat. Durante di e konferensia aki Sithoc a presentá su direktiva ku a sinta den desèmber aña pasa, Sithoc a presentá e hungadónan di e ekipo di promé divishon ku ta bai kompetí den e kampeonato di FFK, Sithoc a trese diferente plan di e organisashon dilanti i tambe aktividatnan den kuadro di preparashon di selebrashon rondó di selebrashon di 80 aña di e organisashon. Banda di esakinan Sithoc a presentá un bandera nobo ku un diseño moderno i unifòrm ku ta un rekuerdo di e 79 añanan di Sithoc.
BESTÜR DI F.C. SITHOC
Durante di konferensia di prensa F.C. Sithoc a presentá nan direktiva ku a sinta na desèmber 2020. E funshonarionan ku ta forma parti di direktiva di F.C. Sithoc ta Urny Floran, presidente, Martha Jessurun - van Brussel, sekretario, Rivelino de Leca, Vise-Presidente, Curthbert Brunkard, tesorero, Carlos Ruiter, komisario, Ricardo Pita Correia, komisario, Darryl Dorothaal, komisario, Nilton Rovina, komisario i Cedric Leona, komisario. Den e direktiva di Sithoc tin personanan konosí den mundu di deporte. Tur ta personanan vèrsá den maneho. Por tuma nota tambe di un kantidat di eks hungadó ku a forma parti di e ekiponan di Sithoc den tempunan di gloria di e organisashon. Meta di e direktiva ta pa den un tempu kòrtiku, forma un organisashon fuerte kaminda norma ku balornan ta para haltu riba bandera. Un ekipo ku ta kompetí i no tei pa partisipá so. Krea oportunidat pa mas hóben por bira miembro i partisipá den e organisashon asina yuda nan alsa nan balor físiko, emoshonal, sosial, personal i intelektual.
E EKIPO DI F.C. SITHOC A REFORSÁ KU DIFERENTE HUNGADÓ
WILLEMSTAD-Pa por kompetí na un nivel haltu den promé divishon e ekipo di F.C. Sithoc a reforsá ku diferente hungadó ku tabata hunga den otro ekiponan manera; Lixiangelo MARTIS di Hubentut Fortuna, Deivid LOPEZ ESCALONA di SUBT, Ruchendro KIERINDONGO di VESTA, Glenciene GREGORIA di Jong Holland, Janian DE KASTER di Victory Boys, Maikel PINEDO di Centro Dominguito, Juan Luis SAUMET COSTA di UNDEBA, Bryan La CROES di Willemstad.
EKIPO DI F.C. SITHOC
F.C Sithoc a presentá un ekipo bon balansa i fuerte durante konferensia di prensa di djaluna último. E hungadónan ta Karshen Alexander, Joram Bergonia, Hulio Christina, Anchurick Coffie, Phaibian Da Costa Gomez, Harley Djaoen, Glenciene Gregoria, Charles Held, David Hyder, Ruchendro Kierindongo, Bryan La Croes, Deivid Lopez Escalona, David Martis, Lixiangelo Martis, Alden Merite, Luis Muňoz Rivera, Maikel Pinedo, Julian Sanchez Perez, Michel Ulloque Florez, Jeremiah Wansing. Direktor tékniko ta Criston ‘Yuyu” Brunkard, asistente direktor tékniko Inchomar Ocalia, entrenadó di kiper Marcelo “Chelo” Pisas i masahista Norwin “Win” Bonafasia. Konsiderando tur e nòmbernan aki e ekipo di Sithoc ta primintí di bira algu serio den kompetensia di promé divishon di futbòl FFK e aña aki.
F.C. SITHOC TIN LUGA PA MAS HOBEN HUNGA BALA
Un di e puntonan ku a bin dilanti durante di e konferensia di prensa di F. C. Sithoc ta, ku un di nan metanan prinsipal ta pa krea oportunidat pa mas hóben por bira miembro i partisipá den e organisashon, asina yuda e hóbennan aki alsa nan balor físiko, emoshonal, sosial, personal i intelektual.
Dor di desaroyá talento di e hóbennan den organisashon hubenil Sithoc por mantené e ekipo den promé divishon fuerte i riba un nivel di kompetensia haltu.
Aktualmente Sithoc tin ekiponan di hóbennan di 7 te ku 13 aña di edat. Sithoc tin plan pa kuminsá ku ekiponan di hóbennan di 14 te ku 20 aña di edat. Mayor di hóbennan ku ta interesá pa hunga den Sithoc por pasa inskribí na Stadion di Sithoc djamars i djárason di 5’or pa 7’or di anochi.
Sithoc kier motivá mayornan pa drenta den komishon di mayor pa yuda direktiva alkansá e metanan stipulá pa e hóbennan.
F.C. SITHOC SU BANDERA NOBO
Den kuadro di reorganisashon, di e organisashon di futbòl F.C. Sithoc, a introdusí un bandera nobo. Ta trata aki di un bandera moderno i ku un nifikashon profundo. E diseño di e bandera ta nifiká lo siguiente; e sirkulo nan riba e bandera ta simbolisá e sirkulo sentral kaminda e wega di futbòl ta start, banda di esaki e sírkulonan ta simbolisá unidat, perfekshon, un sirkulo no tin komienso ni fin esaki ta nifiká ku e organisashon lo tei pa eternidat.
E manera ku e sírkulonan ta aparesé riba bandera ta forma e plan di wega di bala esta e futbòl total 4,3, 3, òf 4, 4, 2 etcetera.
E strepinan ku ta kore vertikal riba e bandera ta keda komo rekuerdo di unifòrmnan ku Sithoc a bira kampeon den dje durante di 5 aña sigui.
Sithoc a mantené e logo ku a ser modifiká despues di 10/10/10.
E unifòrm ku F.C. Sithoc ta hunga kuné e aña aki ta e kolonan original di e organisashon esaki ta pa rekordá e tempunan di ántes i duna rèspèt na e fundadónan i tur esnan ku a forma parti di e organisashon den pasado.
ALGUN OTRO AKTIVIDATNAN DI F.C. SITHOC
Den kuadro di selebrashon di 79 aña di e ekipo di futbòl F.C. Sithoc, e organisashon a tene un Santu Sakrifisio di Misa pa gradisí e Ser Supremo pa tur e añanan di e organisashon i pa pidi forsa pa futuro.
Ku koperashon di Heavy Mix, Selikor i miembronan di e organisashon, Sithoc a limpia den área di e stadion na Muizenberg i a saka 11 baki di shushi grandi.
Durante di e aña lo sigui diferente sekshon di teambuilding, Sithoc lo organisá diferente aktividat sosial pa miembronan, Sithoc a Reorganisá i uni di hubenil te ku veterano.
Sithoc ta trahando pa traha pa engrandese e organisashon i pa traha riba nan fanátikonan pa apoyonan durante di weganan.
E organisashon tin plan pa organisá un torneo internashonal den kuadro di selebrashon di 80 aña di eksistensia.
E problema prinsipal ku Sithoc ta entrenando ta ku nan no tin un spònser grandi pa kubri e organisashon. Direktiva di Sithoc a duna di konosé ku nan ta keda traha duru pa logra esaki, di e forma ei nan por brinda mucha mas na komunidat.
SANTU SAKRIFISIO DI MISA NA OKASHON DI 79 AÑA DI FC SITHOC
Den kuadro di selebrashon di 79 aña di eksistensia di e klup di futbòl FC SITHOC i pa mustra gratitut i apresio inmenso na e Ser Supremo, Miembro i fanátikonan a partisipá na un Santu Sakrifisio di misa, djadumingu dia 7 di mart último na Misa La Bírgen di Fátima, Suffisant.
