Skibí pa Pepi Sulvaran
Update di selekshon di Futbòl di Kòrsou
WILLEMSTAD.- Otro luna nos lo dal nos promé pasonan riba un kaminda ku lo tin di kondusí nos na e próksimo fiesta mundial di futbòl. Kos ta ketu rondó di selekshon. Te ainda no ta kla si Hiddink a logra haña refuerso pa nos selekshon. Manera nos a bisa kaba, si Hiddink no logra haña refuerso, no solamente e kaminda pa Qatar ta bira imposibel, pero e kontratashon di Hiddink lo ta sèn tirá afó. Pero laga nos keda positivo i pensa ku ta trahando den silensio i ku lo anunsiá ora kos ta sigur i definitivo.
Tin notisia alentador si, Darryl Lachman (Perth Glory) ku tabata algun tempu sin ekipo, miéntras tantu ta estelar atrobe na Oustralia. Michael Maria a haña un kontrato pa dos aña ku NAC/Breda ku ta den lucha pa regresá Eredivisie ulandes. Jurien Gaari (RKC), apesar di no ta estelar ta hañando su minütnan atrobe den Eredivisie. Ku esei e defensa pa e promé buèlta aki, ku Eloy Room (Columbus Crew) den gol, ta kasi harmá. E úniko problema ta ku falta un defensa sentral. Cuco Martina ainda ta sin ekipo for di yüli 2020 i e ohochinan Martina ta inaktivo.
Por hala Leandro Bacuna (Cardiff City) un línea atras, pero esei lo debilitá nos bolante. Den bolante Leandro i su ruman Juninho (Huddersfield Town) ku ta e motornan di nos selekshon, tur dos ta den tremendo temporada komo estelar na Inglatera. Brandly Kuwas ku awor a bai hunga na Abu Dhabi pa Al-Jazira tambe ta aktivo hinter temporada.
Riba ala tin mas bon notisia. Gervane Kastaneer ku a bin bèk di un periodo largu di leshon, awor ta aktivo den e liga máksimo eskoses, ku Heart of Midlothian. Gervane ta fuerte, rápido i ta traha duru. El a militá den Eredivisie ku ADO i NAC i den tur selekshon ulandes te ku U-21, pero leshon a stagna su karera. E por hunga riba ala robes den atake, apesar ku e ta di pia drechi, pero tambe komo di dos delantero den un sistema di 4-4-2. Den e par di wega ku e la hunga ku nos selekshon e la demostrá su klase.
Jeremy Cijntje tambe ta un talento fiá di Heracles pa Waasland-Beveren den e divishon máksimo di Bèlgika. E ta un alero rápido ku kapasidat pa anotá. Jarchinio Antonia (Cambuur) otro alero rápido, ta den akshon kasi tur wega den e ekipo ku ta komandá e di dos nivel na Hulanda i ku ta mustra di bai promové fásil pa Eredivisie. Kenji Gorré (Nacional) tambe alero ofensivo tin un bon kampaña na Portugal e temporada aki, e tambe ta kompetensia.
Tin un hubenil ku ya a haña su promé ‘piet’ ku selekshon grandi di PSV, Jeremy Antonisse di 18 aña di pia drechi ku tambe ta hunga riba ala robes. Jafar Arias (VVV) a krese den Eredivisie i si no ta komo estelar, ta haña akshon kasi tur wega. Charlison Benschop (Apol. Limassol) ta sentro delantero di e ekipo na promé lugá na Chipre. Despues di a kuminsá e temporada komo estelar, awor ta kompartí e puesto di sentro delantero ku su rival den e ekipo i ta hañando ménos tempu di wega.
Ku e hungadónan aki so kaba nos por traha un ekipo ku futbolistanan ku tur ta òf a hunga riba e nivel máksimo ulandes, lokual ta un nivel haltu pa nos region. Un di dos defensa sentral so ta keda un interogatorio.
Den un sistema 4-4-2 ku ta kuadra mas ku e kapasidatnan di Arias i Benschop, e defensa ku Room den gol, Gaari riba rèks, Lachman sentral i Maria defensa lateral robes, ta mustra bon. Ku e dos yunan di John Bacuna mei mei den bolante komo ‘spark plug’. Kuwas komo alero ta mustra sigur i Kastaneer, Cijntje, Antonia, Gorré i Antonisse lo tin di lucha pa e otro puesto. Van Kessel (Olympiakos Nicosia) tambe ta un forsa ofensivo. Ku Arias ku Benschop den atake, bo tin un duo ku ta kabesá bon tambe. Roly Bonevacia tambe ta kandidato pa puesto, pero ta sin klup na e momentu aki.
Ainda tin esnan ku a baha di nivel di kompetensia manera Elson Hooi (Muaither SC) ku tin suèltu ku gol den selekshon, Jeremy De Nooijer (Al-Shamal) un bolante kontroladó i Rangelo Janga ku no tin un bon temporada den NEC riba di dos nivel ulandes. No ta kla si e bolante defensivo Kevin Felida (Den Bosch) lo forma parti for di awor aki. Tin basta ekipo su tras i el a laga sa di ke finalisá e paso ei promé ku e konsentrá riba selekshon.
Di tur manera pa e promé buèlta aki nos elenko riba papel ta mustra superior na Sint Vincent, Cuba, Islanan Vírgen Britániko i Guatemala. Despues si e ta bai bira difísil sin refuerso. Laga nos sigui sostené nos selekshon. ‘Pantera Negra rumbo pa woestijn!!!’
