Superstar shorstop Norwin ‘Sor’ Moesquit a bai sosegá djaweps 2 di òktober
WILLEMTAD - Djaweps 2 di òktober 2025, den oranan di mainta, mundu di deporte a risibí e tristu notisia ku nos hungadó di 50+ Norwin ‘Sor’ Moesquit a bai sosegá. Mesora notisia a kuminsá kore riba medionan soshal, radio i televishon. Norwin mihó konosi komo Sor a nanse na Kòrsou 4 di mart 1961 i tabatin 64 aña. Foi chiki Sor a move den Beisbòl for di den Little League serka Frank Curiel pa despues pasa pa Senior League i Hubenil.
Despues di su añanan di Little League Norwin Moesquit a pasa pa ekipo Santa Maria Pirates i a destaká mesora komo shòrtstòp huntu ku otronan ku tabata hunga shòrtstòp promé kuné manera entre otro Ludwig Jakoba. Despues di hopi aña den Santa Maria Pirates Sor a pasa pa ekipo Wild Cats pa despues terminá su karera den Santa Maria Pirates. Sor Moesquit tabata tremendo futbòlista tambe semper i te ku komienso di e aña aki e tabata den e ekipo Moonchi Boys moviendo den gran forma den Liga 50.
Sor a bira malu den luna di mei 2025 i a keda ku kebrante di salú te ku djaweps 2 di òktober. Sor na edat haltu ketu bai tabata un estrea i tabata hungando den Beisbòl Veterano ku Otrabanda (40+), Jandoret Raiders (50+), Nos Tambe Por (60+), Moochi Boys 50+ futbòl. Sor Moestquit tabata forma parti di The Greatest Umpire & Scorer i tabata konosí komo un dje bon umpirenan di e kuerpo. Sor ta tremendo coach di Little League i a forma parti di e kuerpo tékniko ku a bira kampion Latino i Mundial na 2008. Sor ta úniko coach ku a bira kampion komo coach ku selekshon Senior na 2002 i na 2008 ku selekshon Junior.
Norwin Moesquit tin dos yu ku a hunga Beisbòl Little League riba nivel di selekshon bira kampion Mundial i tur dos a firma komo profeshonal ku organisashonnan di Grandes Ligas. Sor, un tremendo persona, hungadó, dirigente i umpire. Nos konosé Sor Moesquit for di tempu di Lagere School na Sint Thomas College. Kondolensia na sra, yunan i demas famia di e defuntu.
