Survivors ta entregá premio na hungadónan individual
WILLEMSTAD — Survivors/The Greatest Umpire Crew djaweps último a entregá premio na e hungadónan individual ku a gana den nan kategoria. Esaki ta relashoná ku e torneo ku a terminá nèt promé ku dianan di Karnaval. E torneo a start dia 24 di yanüari i a finalisá dia 9 di febrüari último. Den e kategoria Liga 50, e ekipo di Ban Serio a resultá kampion, miéntras ku den Sòftbòl Maskulino (Soshal), e título a bai pa e ekipo di Selikor.
Durante e seremonia di entrega di premio ku a tuma lugá djaweps último, Marlon Paz, presidente di Survivors/The Greatest, a dirigí palabra na e presentenan pa despues sigui ku e entrega di e premionan individual. Un detaye otro ta, ku esnan ku a kai den premio no a risibí kopa òf trófeo, sino un sertifikado detayá ku tur nan sifranan i rèkòrtnan anotá riba dje.
Aki nos tin un reportahe i pòtrètnan di e ganadónan individual ku a briya den e torneo aki.
LIGA 50:
Kampion: Ban Serio;
Sup Kampion: Survivors;
MVP: Luigi Yanez di Ban Serio;
Kampeon Bate: Djuric Pieters (Survivors) 7-5 Avg. 0.714;
Edmar Cornelia (Survivors) 7-5 Avg. 0.714;
Kampeon Honronero: Roderick Zimmerman (Survivors) ku 2;
Kampeon pitcher: Michelangelo Boekhoudt (Ban Serio) ku 2 ganá i 0 pèrdí ERA 1.432.
LIGA SOSHAL MASKULINO
Kampion: Selikor;
Sup Kampion: Brandweer;
MVP: Reaygeyson Hariquez di Selikor;
Kampeon bate: Riordan Windster 9-7 Avg. 0.778;
Kampeon Honronero: (Coca Cola) Raino Coran ku 2;
Kampeon pitcher: Carol Servania (Brandweer) ku 4 ganá i 0 pèrdí ERA.
Teksto pa pòtrèt:
Carol Servania (Brandweer) kampion picher Soshal Maskulino.
Raino Coran lider di homerun Soshal.
Djuric Pieters i Edmar Cornelia kampion batenan di Liga 50.
Marlon Paz presidente di Surivors ta dirigí palabra.
Presentenan durante entrega di premio.
Tur ganadó individual ku a gana premio.
Michelangelo ‘Galbou’ Boekhoudt a risibí su premio komo kampion picher 50 despues na velt
Fanátikonan di Extra Inning bon tardi. Wikènt pasá moveshonnan a kuminsá duru pa loke ta trata deporte lokal. Den Sòftbòl hopi moveshon i hopi wega mes den Amstel Bright Premier Cup. Ekiponan di Liga 50 tambe a sali brabu djasabra kaminda ekipo Ban Serio kargá ku estrea a gana di Sluggers ku skor grandi 17-4. Den e sigiente wega Jandoret Raiders mester a lucha pa gana ekipo Lions ku skor 6-4. Despues a sigi algun wega interesante den e kategorianan Modified di e hóbennan i tambe di 40+. Remarkabel e picheo di Modified di hóbennan, ku ta un kos serio. Ponchenan ta kai tras di otro. Kostantemente nos ta puntra dikon no por start ku Sòftbòl Maskulino Fastpitch na Kòrsou.
* * * * *
Hopi fanátiko mes na Amstel Bright Premier Cup na Van Engelen Ballpark pa mira e komienso for di djabièrnè 20 di febrüari. 36 wega tabatin den fin di siman den e kategorianan Liga 50 i Liga 40, Komersial Maskulino, Femenino i Co-Ed (Sosial Corporate i Sosial Plùs). Tabatin 36 wega den fin di siman riba tereno A i B dilanti un bon públiko. Wikènt benidero ta sigi ku e weganan den full swing aya na Van Engelen Ballpark, for di djabièrnè te ku djadumingu. Nos tin resultado di vários di e weganan di wikènt pasá. Djabièrnè Corendon a gana ORCO CSC 7-5, Big Boys a gana Velenñas 12-8, Latino Power 16 - Victory Power 8, SBAB 16- GGZ, SDKk, Dedames 1, The New Radiator 17 - G-Warriors 6, Gunners 16 - Ata Nos Aki 12. Nos lo trata di pone e resultadonan di djasabra pa despues nos pone e resultadonan di djadumingu.
* * * * *
Wikènt pasá nos a papia hopi ku algun hungadó di Beisbòl Veterano, algun di Quality Stars i vários di ekipo Santa Rosa Memories. E dos ekiponan aki lo bai lucha tenás atrobe den e promé 4-nan den 2026, miéntras Santa Maria sigur tambe lo t’adén. A sobra un lugá liber ku tabata den man di Yesterday, pero mirando desaroyonan den Yesterday tin lugá pa un ekipo pa drenta na lugá di Yesterday ku ta entre otro Otrabanda i Broncos. Temporada 2025 ekipo Quality Stars a terminá number 1, sigí pa Santa Maria, Yesterday, Santa Rosa, Otrabanda, Broncos, Azucar i Marlins. Santa Rosa lo bira mas fuerte den 2026, Quality Stars a haña Andley Simmons ku ta un all around player i tremendo picher. Santa Rosa Memories lo por konta ku rumannan Dave i Randy Kirindongo ku lo move di Yesterday pa Santa Rosa Memories.
* * * * *
Nos no a tende nada ainda di moveshonnan di Santa Maria Pirates. BEVEKO no tin direktiva pa start kampionato i no tin potensial kandidatonan pa drenta direktiva pa dirigí kampionato di Beisbòl Veterano 2026. No tin ni rumor ku por pensa ku kosnan ta kanando den bon direkshon. Awe nos tin pòtrèt i resultado final di Torneo Survivors ku a terminá djaluna 9 di febrüari. E entrega di premio tabata djaweps último na sede di SSK na Nieuw Haven. Torneo Survivors/The Greatest ta organisá pa e grupo Survivors/The Greatest ku ta e grupo di umpire i skorernan ku tin mas ku 10 aña ta hasiendo un tremendo trabou di torneonan komersial i tambe liganan, entre otro The Diamond Stars League i Liga 60.
* * * * *
Nos a bai bèk den tempu Amstel Bright Premier Cup tabata Torneo Polar, esei ta 10 aña pasá. Nos ta bai menshoná algun nòmber ku tabata pertenesé na sierto ekiponan 10 aña pasá. Selikor ku Matrona, Winklaar, Pisas, kasi tur tei ainda kontra di MCB ku tabatin Lodowika, Daal i Franken tur tei ketu bai.. CITCO Shendy Cras, Dave Janga, Leonora, Armand Michel, Leticio Rosa ,ets. SBAB tabatin Madison Ortega, Pieter ku segun nos ta na Aruba. Emerenciana a konektá dos homerun pa SBAB den e wega ei. Boso ta kòrda e ekipo Petro Socios. Nan a hunga kontra Insel Air i gana 6 pa 5. Clyd Correa tabata e picher pèrdèdó. Quincy Lambertina, Nurrison Leonora, Ryan Monk, Hillard Cijntje, Endsley ‘Sly’ Schoop tabata e mihó batiadónan. Kustwacht ku Enrique Kroon, Tyron Maximiliana (Max Power) i otronan. Pinnacle, Dennis Neuman, Videon Sloop ets. Nos a bai bèk den tempu loke nos ta gusta hasi. Nos ta keda te aki pa awe i te mayan ku Poder di Dios.
