Swift ta swip Clase Aparte den final i bira kampion Liga van Engelen
WILLEMSTAD- Swift a gana Navegantes den dos wega sigí den final i bira kampion Liga van Engelen. Ta trata aki di e kampionato 2022 ku no por a finalisá, debí na mal estado di tereno. Swift a gana e promé wega ku skor di 8-2 i wega number 2 ku skor di 13-0. Emilio Velarde a picha e promé wega kompletu i despues tabata Dicson Acosta a tira wega number 2 kompletu pa Swift logra e título relatívamente fásil. Despues di wega tabatin entrega di premio na ekiponan i hungadónan individual.
NUMERITONAN
Wega 1
Swift 8, Clase Aparte 2
Swift a dal 13 hit i hunga sin eror. Emilio Velarde tabata e picher ganadó. Dimitri Leon, Dave Kirindongo i Nurison Leonora a bati di 3-2. Dimitri Leon, Michelangelo Trinidad, Nurison Leonora i Emilio Velarde a konektá un homerun. Clase Aparte a konektá 4 hit i hunga sin eror.Quincy Martha tabata e picher pèrdèdó. Ryan Emers a bati di 2-1. E hit di Ryan Emers tabata un homerun.
Wega 2
Swift 13, Clase Aparte 0
Swift a konektá 14 hit i kometé 2 eror. Dicson Acosta tabata e picher ganadó. Dimitri Leon i Ricardo Moreno a bati di 4-3, Dicson Acosta a bati di 3-2. Nurison Leonora a bai di 2-2. Dave Kirindongo i Michelangelo Trinidad a bati un homerun. Clase Aparte a bati 1 hit i hasi 2 eror. Stanley Girigorie tabata e picher pèrdèdó. Urlich Snijders a bati di 2-1.
Fanátikonan di Deporte Kòrsou, bon dia i felis fin di siman. Djadumingu siman pasá tabata Dia di Tata. Tabatin basta moveshon riba terenonan djadumingu, entre otro Beisból Veterano, final di Liga van Engelen, Liga 60, ets. Djasabra nos tabata na Van Engelen Ballpark pa sigi weganan di Liga 50. Bon públiko mes durante weganan di 50+. Na momentu ku nos a yega, nos a pensa ku ta Liga 50 i Liga Amstel tin, pero tabata solamente Liga 50+. Marlins a logra gana di Sluggers ku skor di 7 pa 2. Ban Serio despues di a sali kai atras 5-0 kontra di Jaws den promé inning, ta boltu skor rápidamente. Polisnan Charlton van Thijs i Winston Kirindongo a dal grandslam den di 3 inning pa Ban Serio.
* * * * *
Jaws ku picheo di Ralph Hermans a sali dominá Ban Serio den inning number 1 i 2 pa despues Ban Serio nota 12 kareda den di 3 inning. Hasi e wega 12 pa 5 pa despues nota 7 kareda mas pa finalmente e wega terminá ku skor di 19 pa 6. Baranka a sali relatívamente fasil di Pitufos ganando pa nòkout 15 pa 2. Pitufos tabatin 3 pa 4 hungadó di 60+ riba tereno. E promé 3 batiadónan tabata 60+, Norwin Moesquit, Richenel Juliana i Luis Coffie. Baranka no tabatin niun 60+ riba tereno. Abelino Julia veteranísimo a bati komo emergente den e wega. Baranka ta keda sólido na promé lugá ku skor di 8-0 i nan falta solamente ekipo Flamboyan Tigers djasabra 8 di yüli pa terminá buelta number 1. Tur ekipo ta hunga 9 wega pa buelta.
* * * * *
Rignald Martina ku a kumpli aña den siman a selebrá ku su hungadó i fanátikonan di Marlins djasabra na Van Engelen Ballpark. Tabatin animashon di Toni Ijziek i su grupo i dado momentu Rignald Martina mes a tuma bari i a zona algun tambe kayente den leftfield na station di Marlins na Van Engelen Ballpark. Den un wega sin homerun ku picheo di Gilbert Henrietta ku a bai henter e ruta Marlins a gana. Johnny Balentina, skippy Sambo i Aldrin Visser a empuhá 2 kareda pa Marlins. Den e promé wega djasabra siman pasá Lions a dal Artemisia 23-0. Fabiani Orcadio a bati di 4-3 ku homerun i 4 RBI.
* * * * *
Despues ku mayoría ekipo a hunga 8 wega i faltando un wega pa terminá buelta number 1, standing ta lo sigiente. Baranka 8-0, Ban Serio 7-1, Marlins 6-2, Jaws 4-4, Lions 4-4-, Sluggers 4-4-, Pitufos 3-4, Flamboyan 2-5, Catpower 1-7, Artemisia 0-8. Lider den bateo ta Emmerick Agatha di Baranka ku tin .722. Kelvin Winklaar (Ban Serio) .694, Sherdon Rombley (Ban Serio) .667. Kelvin Winklaar ta lider den RBI ku 16, sigí pa Emmerick Agatha, Fisel Pereira (Baranka) 15, Gerald Zimmerman ( Sluggers) 15. Pa loke ta trata picheo Curtly ‘Gino’ Valeriaan (Baranka) tin un ERA di 3.75. Edison Sambo (Jaws) 4.30. Den ponche tirá Keny Hellement (Baranka) tin 16 ponche tirá.
* * * * *
Den Beisbòl Veterano ekipo Quality a gana di Jandoret Raiders ku skor di 11-3. E wega tabata 2-2 i den di 3 inning Quality Stars a nota 9 kareda pa habri e wega. Quality Stars ta keda invikto ku rekòrt di 4-0. Den otro wega djasabra Vosama a dal Marchena Stars 16-7. Marchena Stars tabata dilanti 6-1, pero e ekipo no por a wanta i Vosama a gana relatívamente fásil pa pone nan rekòrt na 2-2. Santa Maria Pirates a nòkout Marlins ganando 19-2. Bertrand Peters a bati di 3-2 i Signald Paz tabata e picher ganadó pa Santa Maria. Den kurso di dianan nos lo tin tur resultado di weganan di Beisbòl Veterano.
* * * * *
Liga di Nos Tur a start djabièrnè, 16 di yüni den Frank Curiel Ballpark. Tabatin un apertura ofishal ku un desfile. Despues ekipo Sin Stress a dal Un Kara feros ku skor di 18-5. Un Kara ta super kampion di e liga i tin 4 título sigí di e liga. Sin Stress ta mustra fuertísimo den 2023 ku plan serio di kita e dinastía for di Un Kara. Den e otro wega Shining Stars a dal Join Me 10 pa 5. Keda pendiente pa reportahe i mas detaye den dianan benidero. Nos ta keda te aki pa awe.
