Swindley Lint a firma atrobe ku Santa Rosa Indians
WILLEMSTAD- Swindley Lint ku tabata sensashonal pa ekipo Santa Rosa Indians den play-off Beisbòl Dòbel A 2020, a firma ku e ekipo menshoná resientemente. Tabatin rumor ku Swindley Lint lo a bai, pero tabata simpelmente rumor i Lint a firma ku e ekipo dirigí pa Quincy Martina. Santa Rosa a bira kampion despues ku e ekipo a pasa den dos seri kayente bayendo seri kompletu den semi-final i final. Swindley Lint a hunga den organisashon Trai Seru den Little League i despues ku ela regresá for di College na USA a bai Santa Rosa.
Swindley a hunga tersera i segunda base durante kampionato regular i a picha den gran forma den seri final kontra di Royal Scorpions. Ta Swindley tabata tuma e bala den relevo den wega pèrtá ku mester gana, i keda na bida. Swindley Lint ku a picha tres wega krusial den semi-final kontra di Royal Scorpions i tres wega krusial den final kontra Wild Cats. Dado momentu Swindley no a tuma niun kareda limpi i tabata su último dos aktuashonnan ku ela tuma kareda limpi den play-off. Swindley Lint a bati pa averahe di .301 overall durante kampionato i play-off. Den e último weganan su bate a lòs bon kontra Wild Cats. Den dianan benidero nos tin mas detaye di Swindley Lint ku ta yu di Oswin ‘Boeis’ Lint dirigente di Trai Seru i Liga Pariba den Little league.
