WILLEMSTAD- Djabièrnè 18 di febrüari 2022, The Diamond All Stars League a start na Sam Bunting Ballpark. Despues di apertura ofishal tabatin wega entre Mas Goso i The Fighters. Den un wega bon bringá, Mas Goso a gana The Fighters ku skor di 7 pa 6. Mas Goso a sali dilanti den e partido i keda ganá te final. The Fighters a trata di empatá e wega, pero a keda nèt kòrtiku. Den e otro weganan Rising Trotters a dal Lady G ku skor di 13 pa 1. Treasure a dal Eureka 18 pa 2. Nos Goso a nòkout Warriors 17-0. The Diamond All Stars League a sigi ku 7 wega riba djabièrnè, djasabra i djadumingu awor na Sam Bunting Ballpark. Weganan di djabièrnè, Nos Goso 7 - Eureka 0, Treasure 20 -The New Warriors 0. Djasabra Rising Trotters 9 -Mas Goso 3. The Fighters 24 -Lady G 2. Weganan a sigi djadumingu Mas Goso 6 -Lady G 2, Rising Trotters 9 - The Fighters 2, Nos Goso 5 -Treasure 4.
Mas Goso 7, The Fighters 6
Mas Goso a konektá 12 hit i hasi 5 eror. Dayenne Prnce tabata e picher ganadó Sovienny Kleinmoedig i Arnalda Margarita a bati di 2-2. Loeshemains Kook di 1-1. The Fighters a bati 5 hit i hasi 3 eror. Sevilla Martina tabata e picher pèrdèdó. Celeste Francisca a bati di 2-2.
Rising Trotters 13, Lady G 1
Rising Trotters a dal 15 hit i kometé 3 eror. Marilyn Windster a gana e wega i Janella Comenencia a bati di 3-3. Soraida Luisa- Molina i Sovianca Calmera a bai di di 2-2. Lady G a bati 5 hit i hasi 1 eror. Geraldine Isabella tabata e picher pèrdèdó. Marita Regina i Lidoushka Melfor a bati di 2-1.
Treausre 18, Eureka 2
Treasure a bati 20 hit i hunga sin eror. Janitza Betrian a bati di 3-3, Solange Soliana di 4-3. Ismary Ignacio i Sulena Lacrus di 2-2. Eureka a dal 5 hit i hasi 4 eror. Picher pèrdèdo tabata Jermyda Lake Garcia. Francois De Aquino i Torres a bai di 2-1.
Nos Goso 17, Warrios 0
Nos Goso a bati 21 hit i hunga sin eror. Emily Jonis tabata picher ganadó. Asila Finies e mihó batiadó.
Warriors a dal 2 hit i hasi 2 eror. Candida Gregorius tabata e picher pèrdèdo. Bernadina tabata e mihó batiadó.
INFORMASHON DI SÒFTBÒL I BEISBÒL
Lesadónan di Deporte Kòrsou , bon dia. Nos tei atrobe kargá ku informashon di Beisbòl i Sòftbòl. Marchena Braves ta sigi move i nan a firma e kècher Issachar Pereira. Bon kècher ku tabata den ekipo Firebirds despues ku ela militá entre otro den Royal Scorpions Hubenil. Segidamente Pereira a bai Wild Cats i despues Firebirds. Ekipo Marchena lo haña mas stabilidat tras di plato. Marchena a risibí mesora e tremendo coach ku ta Humphrey Granger. Un coach entrenadó dediká ku tin hopi aña den Beisbòl tantu komo picher den pasado i pa sigur 20 aña òf mas komo coach. Marchena Braves a anunsiá ku tin mas na kaminda. E firmamentu di e hungadó Pereira a tuma lugá den Bam Bam Tech Zone aya na Sambil serka Hensley Meulens.
* * * * *
The Diamond All Stars League a start i sigi ku dos wega den fin di siman na Sam Bunting Ballpark. Djabièrnè Mas Goso a gana The Fighters pèrtá ku skor di 7-6. Dayenne Prince a gana i Kleinmoedig a bati di 2-2. Nos Goso a dal Warriors duru ku skor di 17 pa 0. Emily Jonis tabata den gran forma komo picher ganadó i ela konektá un homerun. Djasabra Rising Trotters a gana Lady G 13 pa 1. Despues a sigi dos wega djadumingu kaminda Treasure a zona Eureka 18 pa 2 ku picheo di Minerva Maduro. Despues ku Gobièrnu a kita varios medida, The Diamond All Stars League a adaptá e skèdjel i pone mas wega riba djabièrnè, djasabra i djadumingu. Djabièrnè i djasabra lo tin dos wega i djadumingu lo tin 3 wega. Ariba nos tin resultado di djabièrnè i djasabra 25 i 26 di febrüari tambe.
* * * * *
Djarason último tabatin reunión pa ekiponan di Beisbòl Veterano na De Oleander. Ta trata di reunión pa ekiponan di tantu 40+ komo 50+ ku ta start 7’or. Direktiva di BEVEKO a manda proposishon di kambionan den algún regla i relato pa ekiponan. Beisbòl Veterano a krese formal último 10 añanan te ku dado momentu a stòp di tuma ekipo. Den otro liganan tur aña direktivanan ta habri posibilidat pa mas ekipo inskribi. Miéntras tantu dirigentenan di Amstel Bright Premier Cup ta pendiente di inskripshon di ekiponan. Fundashon Van Engelen Ballpark a manda un mail ku reglanan nobo pa loke ta trata Torneo Hope.
* * * * *
Ata e kategoríanan i e reglanan. Kategoríanan ta Maskulino, Femenino i CEOD den Soshal. Tin un kategoría nobo ku ta Soshal 40+. Tin tambe e kategoría Challenger. Edat mínimo ku por partisipá ta 18 aña. Esei ta un regla ku tei basta aña kaba. Siguiente reglanan a ser kambiá/adaptá.
E asina yamá hungadó aktivo na ta bálido mas. Nos ta kere ku esaki ta Challenger. Den e kategoría Soshal un ekipo por hinka máksimo di 4 kareda pa inning, despues di esaki e inning ta bòltu. Esaki ta bálido pe promé 5 inningnan. Un hungadó por bati maksimalmente 1 homerun pa wega, e siguiente homerun lo ser anotá komo un single i koredónan nan por avansá solamente 1 base. Poko regla kompliká ku ekiponan lo haña splikashon durante reuniónnan ku ta na kaminda.
* * * * *
E hóbennan di Akademia di Beisbòl di Tera Cora resientemente tabata na Bam Bam Tech Zone. E pareha Merikano Brentt de Graft a bolbe hasi algú tremendo pa e organisashon i a spònser 1 aña di training pa e organisashon na Bam Bam Tech. Miéntras tantu Beisbòl Little League a sigi den tur liga i tur divishon. Liganan a kuminsá skohe nan téknikonan kaba pa kuminsá prepará pa play-off promé ku temporada regular terminá. Play-offnan lo bira kayente atrobe manera ya a bira un tradishon. Lo tin play-off den 5 divishon. Minor, Little, Junior, Senior i Intermediate. Den Intermediate lo hunga manera un mini kampionato di 12 wega. Kampionato Latino Amerikano di Intermediate lo tuma lugá na Kòrsou probablemente den Stadion Post 6 di 26 di yüni pa 3 di yüli.
* * * * *
Bèk pa Beisbòl Veterano ekipo The Brothers di bèrdat a reforsá formal i lo tin un manager nobo. Ta trata aki di un hende den periodismo deportivo ku lo remplasá Signald Burnet ku tabata general manager i manager. Varios hungadó nobo di peso den ekipo The Brothers pa 2022. The Brothers tin un torneo warm up di Beisbòl Veterano ku lo start sea 18 di mart of 25 di mart. Nos ta keda te aki pa awe.
