Tim di Futbòl di Damas di Boneiru na Kòrsou e wikènt aki i informashon kompetensia biyar
KRALENDIJK - Pa medio di e komunikado akí nos di SV Atlétiko Flamingo United Girls kier informá boso lo siguiente. Nos organisashon lo bai tin dos enkuentro deportivo na Kòrsou kual lo ta riba e fechanan 6 i 7 di òktober benidero. Nos lo bai tin un enkuentro ku CVV Willemstad i Vesta riba e fechanan ariba menshoná. E dos enkuentronan akí lo bai sirbi tambe pa forma un laso deportivo entre nos i hermana isla Kòrsou. Mirando ku último tempu futbòl di dama ta wòrdu hopi promové, nos di SV Atlétiko Flamingo United Girls lo ke pa nos damanan ta bon prepará pa asina por representá Boneiru, na momentu ku tin kompromisonan,tantu lokal komo internashonal.
E delegashon lo biaha djaweps 6 di òktober benidero i riba e fecha akí lo enfrentá CVV Willemstad na vèlt di Willemstad.
Djabièrnè 7 di òktober 2022 nos lo enfrentá Vesta na vèlt di Vesta na Sta. Maria. Djasabra 8 di òktober 2022 lo tin un parti di 'team building' i riba djadumingu 9 di òktober 2022 e delegashon lo ta bèk na Boneiru pa 19.30 or di anochi.
Nos ke yama danki na tur ku a hasi e biahe akí posibel espesialmente nos spònsernan; Multi Post, Top Professional Cleaning, Optica Class, Voyager Bonaire, Gobièrnu di Boneiru (nos diputado di deporte sr. James Kroon), FFB i tambe Indebon.
Resultado Biyar di wikènt pasa
Federashon Biyar Kòrsou su evento mensual a tuma lugá wikènt último i a konta ku partisipashon di 22 biyardista . Manera kustumber e evento tabata patrosiná pa Montana Bierhuis i House of Billiard Play . Den buelta di ganadó , e último kuater hungadónan ku a enfrentá otro tabata Jeffrey Nieuwenhuijzen kontra Sybren Boekhoudt kende a bai ku e viktoria ganando ku skor pèrtá 7 pa 6 . Den e otro partido dos Bocanero a topa otro, Shamir Tremus a demostra nivel riba mesa i ta gana Richinelo " Nello " Francisca 7 pa 0 .
Den e promú partido di semifinal Shamir ta sali vensedó kontra Sybren, skor 7 pa 3 . Den buelta di pèrdèdó e number 1 di Kòrsou a kita tur duda i buta rèspèt . Nieuwenhuijzen ta kuminsá su ruta pa final ganando di Hugo Limon 7 pa 2 , Nello 7 pa 0 i Sybren 7 pa 5 . Den e partido final Jeff ta eliminá Shamir ku skor di 8 pa 4 . Ata e resultado final : Empatá na puesto 5 , Hugo Limon i Barat Ibrahim, puesto 4 Richinelo Francisca , puesto 3 Sybren Boekhoudt , supkampion Shamir Tremus y kampion Jeffrey Nieuwenhuijzen . Febiko ta manda felisitá e finalistanan i ta invita tur biyardista pa e sigiente evento di fin di òktober.
