Torneo Amstel Bright Premier Cup di 4 pa 20 di Mart
WILLEMSTAD- Torneo Amstel Bright ta klá pa start. Den fin di siman dirigentenan di Amstel Bright Premier Cup a manda invitashon pa ekiponan den kategoríanan kompetitivo Slowpitch, Soshal/Komersial i 50+. Nos a risibí un komunikado di e organisadónan ku ta dirigentenan di ekipo Cicoza.
“Gobièrnu a anunsiá ku a de-eskalá medidanan i ku por organisá evento deportivo atrobe den airu liber ku fanátiko. Mesora nos ke hasi uso di e oportunidat pa organisá e di ocho Torneo di Softball, ku ya pa sinku aña siguí ta karga e nòmber (Amstel) Bright Premier Cup. Tur wega lo tuma lugá na Van Engelen Ball Park i e fecha nan definitivo pa e torneo lo ta 4, 5, 6, 11, 12, 13, 18, 19 i 20 di Mart.
Si tin interes i si tin ekipo ku por hunga kaba 25-26 di Febrüari nos lo programá weganan tambe riba e fecha nan menshoná. Inskripshon pa e torneo aki ta di Fls.200,00 ku ta pa yuda kubri gastu di bala-empayer-trofeo ets. E suma aki tin ku wòrdu pagá pa mas tardá promé ku bo promé wega na kantina sea kèsh òf via swipe. Por paga e suma di inskripshon tambe online pa kuenta di SBC Cicoza, Mexicoweg 17, MCB Acc 25857606.
Inskripshon lo wòrdu tratá a base di: First come, first serve! Nos ta urgi un i tur pa inskribí si por promé ku djárason 23 di Febrüari pa nos por saka skèdjel, reglanan ets. mas lihé ku ta posibel. Pa mas informashon Ryan Isebia na 5690867 (App), Pim Fangman na 5104835 (App) òf mail ryanisebia@gmail.com i pim@fangman.org. Ekipo invitá den 50+ ta: Ban Serio, Jaws, Artemisia, Jandoret Raiders, Marlins, Mon Repos Sluggers, Flamboyan, Pitufos, Sharks/Baranka i Lions.
INFOMRASHON DI BEISÒL I SÒFTBÒL
Fanátikonan di Deporte Kòrsou, bondia i felis siman. Hopi informashon i moveshon despues ku Gobièrnu a anunsiá ku a kita Toque de Queda i deporte por start atrobe. Varios moveshon for di wikènt kaminda organisadónan ya a anunsiá torneonan, entre otro Torneo Amstel Bright, Torneo Hope, ets. E siman aki tabatin reunión di Beisbòl Veterano pa regla asuntunan pa start ku kampionato 2022.
` * * * * *
Torneo Amstel Bright lo tuma lugá dianan 4, 5 i 6 di Mart. Di dos wikènt ta 11,12 i 13 di Mart. E wikènt 18, 19 i 20 di mart. Weganan ta tuma lugá na Van Engelen Ballpark. Ekipo Cicoza ta organisadó di Torneo Amstel Bright ku semper ta kargá ku premionan hopi lukrativo i plaka kèsh. Ekiponan Komersial di Slowpitch i Liga 50 ta partisipá na e grandioso torneo aki. E interes ta hopi grandi i lo start e torneo un wikènt mas tempran. Na 2021 no tabatin Torneo Amstel Bright i na 2020 e torneo a terminá nèt un dia promé ku Gobièrnu kuminsá tuma medida.
* * * * *
Fundashon Van Engelen Ballpark ta organisá Torneo Hope e aña aki. E torneo lo start dia 25 di Mart i terminá dia 27 di Aprel ku ta Dia di Rei. Tin varios regla ku a kambia pa hasi e torneo mas atraktivo, pa evitá ku un ekipo fuerte lo por masakrá un otro ekipo ménos bon. Ke mèn, hopi moveshon mes mes den e dianan benidero. Organisadónan di Torneo Hope lo tin mas detaye den e dianan benidero.
* * * * *
Ekipo Ban Serio tabatin reunión general ku Jerry Booi djasabra último. Dr. Jerry Booi lo keda komo General Manager i maneho tékniko lo ta den man di un manager. A aserká Renato Anasagasti pa bira manager i Nato ta pendiente pa duna un kontesta. Despues ku Jerry Booi a anunsiá ku e ta stòp hopi tabata na kareda for di Ban Serio i awor hopi tei bèk. Esnan ku tabata bai laga nan ekipo pa bai Ban Serio tambe a bira kabes pariba bèk, despues ku Jerry a anunsiá ku e ta keda den e ekipo, pero den un otro funshon.
* * * * *
Ekipo Catpower lo bini mas mihó pa loke ta trata kampionato Liga 50 di Sòftbòl. E ekipo di Teti Chirino lo haña Denley Marten, Norman ‘Slobbo’ Sloop tei bèk. Wendell van het Kruys ku tabata den Catpower i a move pa ekipo Ban Serio den 2021, lo ta huntu ku Catpower atrobe den 2022. Catpower hasiendo lo máksimo pa bira un ekipo ganadó den 2022. Apesar ku no a gana niun wega den 2021, hopi hungadó ta kontentu kon e ambiente tabata i no tabata teme pa pèrdè pa defolt manera tabata e kaso na 2020 ku hopi hungadó bon, pero ku tabata bini wega un adén un afó.
* * * * *
Direktiva di Beisbòl Veterano Kòrsou (BEVEKO) a manda mail ku relato i tur detaye finansiero i general di temporada 2021. Tin algún proposishon pa kambio den 2022. Direktiva di BEVEKO ta enkabesá pa Sendy Cras. Den direktiva tin Gino Valeriaan, Dennis Dambruck, Etienne Kooks i otronan. Bon trabou sigur den 2021 i keda pendiente pa mas. 13 ekipo lo tin den 2022 pa loke ta trata Liga 40 i Liga 50 probablemente 6 ekipo.
* * * * *
Djasabra mandatarionan di Gobièrnu a sende lus na Frank Curiel Ballpark den presensia di hopi hóben pelotero i dirigentenan di Little League. E parke a haña lusnan nobo nobo despues di basta aña. Eugene ‘Baka’ Sambo presidente di Liga Pabou i yu di Frank Curiel a dirigí palabra i gradisí tur ku a koperá pa e parke por haña lusnan nobo. Minsiter van Heydoorn tambe a tira spich, pa despues sende e lusnan. Frank Curiel tambe a dirigí palabra despues ku a kaba di sende e lusnan. Bon públiko presente na e apertura pa despues mira un tremendo partido di Little League.
* * * * *
Nos ta pendiente pa resultadonan di Little League pa pone den nos edishonnan di e siman aki. Little League Sòftbòl tambe ta pendiente pa kompetensianan internashonal e aña aki. Lo tin ekiponan di Junior i Senior den eksterior. E kampion ta start djabièrnè 4 di mart ku partisipashon di 13 ekipo reparti den 4 divishon.
