Torneo Lions 60+ a start djasabra na Frank Curiel Ballpark
WILLEMSTAD- Torneo 60+ organisá pa Lions a djasabra 20 di aprel na Frank Curiel Ballpark. Tur e 8 ekiponan di 60+ ta partisipando den e torneo ku lo dura dos wikènt. E gran final lo ta djadumingu 5 di mei pa 3’or pm den e parke menshoná.
Ta un torneo tradishonal ku Lions ta organisá promé ku kampionato di Liga 60 start. E ekiponan ta repartí den dos pul. Den Pul A tin ekiponan Los Amigos, Mangusa (Nos Power), Nos Tambe Por i Curacao Super Stars. Pul B ta ekiponan Sluggers, Pitufos, Jaws i Lions.
RESULTADONAN Djasabra 20 di aprel
Jaws 6, Pitufos 2
Mangusa 4, Curacao Super Stars 0
Nos Tambe Por 6, Los Amigos 0
SKEMA
Pul A: Pul B:
Los Amigos Pitufos
Mangusa Sluggers
NTP Jaws
Cur SSS. Lions.
20 Aprel:
10:00 Lions - Sluggers;
12:00 Jaws - Pitufos;
14:00 Cur SSS - Mangusa;
16:00 Amigos - NTP.
21 Aprel:
10:00 Lions - Pitufos;
12:00 Amigos - Mangusa;
14:00 Jaws - Sluggers;
16:00 Cur SSS - NTP.
4 Mei:
10:00 Lions - Jaws;
12:00 Cur SSS - Amigos;
14:00 Mangusa - NTP;
16:00 Pitufos - Sluggers.
5 Mei:
11:00 3 Pul A - 3 Pul B;
13:00 2 Pul A - 2 Pul B;
15:00 1 Pul A - 1 Pul B.
Ekipo One Family den Torneo Hope
WILLEMSTAD- Resientemente ekipo One Family a keda fundá i ta partispando den Torneo Hope. Ta trata di un ekipo ku ta hasiendo furor den Torneo Hope i lo sigi hasi furor den Sòftbòl Komersial bala moli. Eksito na e ekipo aki.
MAS INFORMASHON DI SÒFTBÒL I BEISBÒL
Fanátikonan di Deporte Kòrsou bon dia. Tremendo ambiente fin di siman pasá na Sam Bunting Ballpark durante Torneo 10 aña Un Kara. Un bon torneo internashonal ku partisipashon di ekiponnan di Kòrsou, Boneiru i Canada. Nos Goso a sali kampion manera antisipá pa nos. Nos Goso ta e ekipo to beat ku tin 2 aña sigí ta sali kampion di Diamond All Stars League. Un Kara ta yama danki na spònsernan Gobièrnu di Kòrsou, Vanddis, MCB, Sindikatonan SAP i Straf. Un Kara ta pendiente pa kampionato di Liga di Nos Tur ku ta preparando pa start pronto.
* * * * *
Play-off di Little League kategoría Junior a start djaweps ku weganan entre Liganan Willemstad, Pariba i Pabou. Resultadonan te ainda ta Djaweps Pariba 10, Willemstad 0. Djabièrnè Pariba 3, Pabou 1. Djasabra, Pariba 19, Willemstad 5. Wega number 2 djasabra Pabou 13, Willemstad 0. Lo tin un buelta preliminar e wikènt aki pa despues sigi den wikènt di 25 pa 28 di aprel. E dos mihó selekshonnan lo sigi pa e di dos wikènt manera tabata e kaso den Intermediate. Play-off kayente atrobe i chèns ta grandi naturalmente ku Pabou i Pariba lo topa otro den e seri mihó di 5. Ta trata di vários hungadó di Liga Pabou ku na 2022 a hunga Little League World Series. E selekshon di Pabou aki a pèrdè den kategoria Intermediate kontra di Pariba. E seri aki ta pinta di bira mas kayente ku e seri di Senior ku e resultá den un swip pa Liga Pabou.
%20copy.jpg)
* * * * *
Komportashon di fanátiko i tur envolví den Little League ta den gran forma te ainda den e play-off di e dos liganan ku a tuma lugá. Selekshon Senior Pabou lo representá Kòrsou den e kampionato di Karibe na Mayaguez (Puerto Rico) di 21 pa 30 di yüni. Selekshon Intermediate lo ta na República Dominicana di 23 pa 30 di yüni. Kampionato di Karibe di Little League ta na Kòrsou di 14 pa 21 di yüli. Weganan lo tuma lugá den Stadion Post 6. Junior League ta na Managua (Nicaragua) di 5 pa 14 di yüli. E dos mihó selekshonnan di Kòrsou ku lo representá nos ta kla pa gana e seri p’asina Kòrsou bai Williamsport pa di 4 biaha sigí. 2019, 2022 i 2023. Na 2020 i 2021 no tabatin kampionatonan di Karibe tampoko Latino Americano debí na Covid-19.
* * * * *
Pabien na ekipo Nos Tambe Por ku a gana Torneo Kid Boca Chica. Manera nos a relatá den edishon di djaluna, Nos Tambe Por a gana di Pitufos 4 pa 3 pa bira kampion. Selebrashon a sigi te den oranan lat di anochi na Chipi Chipi. Grandinan di tur tempu di ekiponan di Santa Maria manera Roy Jakoba, Chal Sint Jakoba i Henri Parabirsing ta yegando serka pa yuda e ekipo. Manager i general manager Jero William tabata tei djasabra na Torneo Lions ku ta start wikènt benidero. Den Torneo Lions lo tin tur ekipo di Liga 60, esta 8 ekipo presente pa hinka e kurpa den kondishon nèt promé ku start kampionato ofishal.
* * * * *
Nos a mira grandinan di tempu di nan tempu manera entre otro Archie Davelaar ku a kuminsá move den 60+ ku Pitufos. Archie tin 58 aña i den torneonan promé ku kampionato hungadónan di 58 aña plus por kompetí. Nos a mira Michiel de Roon ku ta kla pa hunga den kampionato di 60+ e aña aki si. Den e artikulo nos tin skema di Torneo Lions ku ta start djasabra awor. Vários ekipo ta preparando pa Kopanan ABC&S di Liga di hóbennan, 40, 50 i 60 na Aruba, Boneiru, Sint Maarten i Kòrsou. E torneonan ei ta alrededor di 9 di mei.
* * * * *
Nos a risibí un flyer pa loke ta trata e torneo Golden Athletic Championship ku lo tuma lugá di 8 pa 13 di mei den Stadion Post 6 i organisá pa Pitufos. Lo tin partisipashon di ekiponan di Aruba, Kòrsou, Puerto Rico, República Dominicana, Cuba i Colombia. Den simannan benidero nos lo tin skema ku nòmber di ekiponan. Deportenan a kuminsá kue drive i ta pendiente pa vários start di kampionatonan tambe. Nos no tin masha informashon di Liga Amstel, Van Engelen i 40. Sòftbòl Liga 50 ta start djasabra 4 di mei na Van Engelen Ballpark ku 4 wega.. Beisbòl Veterano a anunsiá ku kampionato ta start dia 4 di mei i lo wanta ku e kampionato e sigiente wikènt. Nos a tende ku ekipo Attack di Beisbòl Veterano 40+ di Hulanda lo ta na kaminda pa Kòrsou den luna di novèmber 2024. Nos ta keda te aki pa aworaki ku Poder di Dios.
