Treasure ta swip Nos Goso i klasifiká pa final di The Diamond Stars League
WILLEMSTAD- Treasure ta gana Nos Goso djabièrnè i djasabra pa pasa pa final di The Diamond Stars League. Treasure lo topa ku ekipo Rising Phoenix den final. Ekipo Rising Phoenix a gana e seri 1 kontra 2 kontra Treasure mes i ta den final for di siman pasá pendiente di e ganadó entre Treasure i Nos Goso. Djabièrnè e wega a terminá 9-5 i djasabra 10 pa 8 na fabor di Treasure. E gran final mester a start djabièrnè 13 di mei na Sam Bunting Ballpark. Awaseru a kai i wega a para djabièrnè i ta pendiente pa di wer pa wak si wega lo sigi djasabra. Djasabra tambe weganan a keda suspendé.
Treasure 9, Nos Goso 5 Treasure a dal 13 hit i hunga sin eror.Suyen Otto Apostel a gana. Dorany Javier Valerio a bati di 3-3. Anoushka Delando di 2-2 ku un homerun. Nos Goso a bati 8 hit i hasi 3 eror. Carlientje Cleopa tabata e picher pèrdèdó. Miriela Carlo a bati di 3-2 i konektá un homerun. Vanessa Winklaar tambe a bati di 3-2. Joyce Arnhem a bati di 1-1.
Treasure 10, Nos Goso 8 Treasure a bati 13 hit i hasi 2 eror. Suyen Otto Apostel tabata e picher ganadó atrobe e biaha aki den relevo. Tanusi Delando a bati di 2-2, Dorany Javier Valerio a bati di 2-2. Nos Goso a bati 13 hit i hasi 2 eror. Emily Jonis i Vanessa Winklaar a bai di 2-2.Vanessa Winklaar a konektá un homerun.
Torneo Wim Felicia 50 aña picher di Slowpitch di 3 pa 6 di yüli den Frank Curiel Ballpark
WILLEMSTAD- Di 3 pa 6 di yüli lo tin Torneo Wim Felicia 50 aña den Slowpitch. E torneo lo konta ku partisipashon di un ekipo di Boneiru i ekiponan di Kòrsou. Lo tin ekiponan di Liga 60, di Liga 50 i di ekiponan di femenino veterano. E as picher di Slowpitch Willem ‘Wim’ Felicia for di aña pasá a kuminsá traha riba su torneo den kuadro di selebrashon di 50 aña pichando Slowpitch na Kòrsou i Karibe Hulandes. Wim ya tin tras di lomba torneonan kaminda ela selebrá 25, 30 i 35 aña pichando bin ariba..
Na Hulanda tabatin hopi interes den ekiponan pa bin duna honor na Wim Felicia su selebrashon, pero e ekiponan ku tabata pa bin a kanselá. Naturalmente ekiponan ku Wim ta hunga den, esta Nos Tambe Por i Ban Serio ta para tras di e torneo menshoná. Wim a gana masha hopi premio kampion picher i MVP. Tambe Wim a bira kampion ku masha hopi ekipo mes den Slowpitch. Semper Wim a lusi bon na bate tambe ora tin mester i den Nos Tambe Por 60+ Wim ta bati bon i hunga primera base.
MAS INFORMASHON DI SÒFTBÒL I BEISBÒL
Fanátikonan di Extra Inning, bondia. Fin di siman pasá tabatin weganan di The Diamond Stars League, Liga 50 i Liga 60. E wikènt aki ta start ku Beisbòl Veterano na Vi Jansen Ballpark. Ekiponan a keda 9, ekipo Isla a konfirmá ku nan lo hunga den Beisbòl Veterano Liga 40. Ta pendiente tambe pa start ku Liga 50 den luna di yüli. Den The Diamond Stars League ekipo Treasure a swip ekipo Nos Goso (Gai Lihe) i klasifiká pa final kontra di Rising Phoenix. Ekipo Rising Phoenix a gana e seri 1 kontra 2 i ta den final kaba. Resultadonan di wikènt tabata 9-5 i 10 pa 8 na fabor di Treasure.
* * * * *
E wega di semi-final djabièrnè último, Treasure a gana relatívamente fásil por bisa. Djabièrnè defensa di ekipo Nos Goso a laga nan picher estelar Carlientje Cleopa na kaya i a kometé 3 eror krusial. Cleopa a permití 9 kareda di kual solamente dos kareda tabata limpi. Di otro banda Treasure si a filea limpi i tur e 5 karedanan di Nos Goso tabata limpi. Djasabra Nos Goso tabata ganá 8 pa 6 bayendo último inning i Treasure ta nota 4 kareda den kabes di e di 5 inning pa bòltu e skor i sali viktorioso. E final ta start djabièrnè awor na Sam Bunting Ballpark. Ta spera un púbiko grandi atrobe manera tabata e kaso den tur e weganan di play-off.
* * * * *
Pabien na Kòrsou i selekshon di Futbòl di Kòrsou ku un viktoria impreshonante djabièrnè siman pasá i den stadion Ergilio Hato pa klasifiká pa e buelta final di e parti di CONCACAF rumbo pa Mundial di Futbòl. Kòrsou a gana Sint Lucia ku skor di 4-0. Djamars a hunga kontra Haiti den un wega kaminda tur dos ekipo tantu Kòrsou komo Haiti ya a klasifiká pa e sigiente buelta. Hati tambe a haña serka selekshon di Kòrsou i wega a termian 5-1. Tremendo asistensia di e púbiko, kasi 8 mil hende den stadion pa mira e wega. Na Aruba e pueblo a animá Korsou sin fin. Anima mes mes i esei ta di fuentenan ku nos tin ku tabata den Stadion na Aruba. Pabien Kòrsou i nos mester keda skèrpi kontra Haiti rumbo pa e sigiente buelta. Tremendo trabou di e direktiva nobo di FFK.
* * * * *
Beisbòl Dòbel A start djasabra ku weganan entre Santa Maria Pirates i Royal Scorpions. Ekipo Santa Maria a gana ku skor di 12-10 kaminda Santa Maria tabata atras 10 pa 4, pero a nota 8 kareda den bòm di e di 7 inning. Kevin Gibson a konektá grandslam kontra e picher Lourens ku a drenta di relevo pa Royal Scorpions. Kevin Gibson a destaká pa Santa Maria bayendo di 4-2 ku homerun i 6 kareda empuhá. Santa Maria a usa 4 picher pa por a gana e wega menshoná. Archenau Martina, picher un tempu prospekto den kategorianan di Little League pa bira profeshonal, a picha i gana Santa Maria. E tabata e picher ku a tira e dos último inningnan.
* * * * *
Den Liga 50 Sòftbòl djasabra ekiponan Jaws, Ban Serio i Marlins a gana. Jaws a laga Pitufos den tereno riba un eror den último inning. Pitufos tabata ganá te den bòm di e di 7 ku skor di 3-2. E wega a bai 8 inning i den Tie Break Jaws a laga Pitufos den tereno ku skor di 4-3. Ban Serio a dal Flamboyan Gamers duru ku skor di 14-4. Den e último wega Marlins a derotá Lions 9-3. Weganan ta sigi djasabra awor na Van Engelen Ballpark ku entre otro Jaws kontra Catpower Raiders. E promé wega di djasabra último entre Catpower/Raiders i Jaws a keda suspendé pa motibu di palu di awa ku a kai den oranan di mainta djasabra. Djasabra 14 di yüni e promé wega a keda suspendé pa motibu di awaseru. Ta pendiente pa tuma desishon di e sigiente weganan.
* * * * *
Beisbòl Veterano mester a start djasabra di 14 di yüni ku wega entre Isla Crackers i Santa Rosa Memories 1’or i despues pa 3.30’or ta Azucar kontra di Yesterday. Djadumingu tambe lo tabatin dos wega, 1’or ta Otrabanda kontra Marlins i despues Quality Stars kontra di Santa Maria ku ta kampion kontra supkampion. Nos ta pendiente pa programa di apertura ofishal i mas detaye. E kampionato lo bai 2 buelta entre 9 ekipo. Ke mèn, tur ekipo ta hunga 16 wega pa despues start ku play-off di 5-6, segidamente e ganadó kontra e number 4 i semi-final i final. Ekipo Isla a anunsia djarason ku nan no ta partisipa mas i lo reskedjèl tur kos di nobo. Breaking News ta ku weganan di e wikènt aki a keda kanselá te otro siman. Nos ta keda te aki pa awe i te djarason ku Poder di Dios.
