TUR KOS TA KLA PA NOS SELEKSHON NASHONAL TOPA TRINIDAD & TOBAGO AWE ‘NOCHI 7’OR DEN STADION ERGILIO HATO!
E DIA A YEGA!
WILLEMSTAD - Awe (aworaki) 14 di òktober 2025 nos selekshon nashonal lo tin su di kuater partido di kualifikashon pa Mundial di FIFA! E partido aki tambe lo tuma lugá pa 7’or di anochi den Stadion Ergilio Hato, kontra Trinidad & Tobago! Meskos ku nos partido di djabièrnè último, e partido di aki ratu tambe ta ‘sold out’ i no tin mas karchi disponibel na niun punto di benta ni na porta.
Portanan di stadion ta habri for di 5’or di atardi, pues yega trempan pa evitá tráfiko i stagnashon na porta. Kada sekshon lo tin nan propio entrada i tin vários bòrchi ku indikashon di e entradanan di kada un di e sekshonnan aki. Tur kos a keda mesun kos, pues awe tambe tin e opshon pa stashoná outo na Crefona ku Industriepark, kaminda lo bai tin bùsnan ku ta transportá tur nos fanátikonan pa stadion. E bùsnan aki lo kuminsá transportá hende for di 5’or di atardi i lo keda kore te ora wega finalisá.
Nos ta gradisí pueblo di Kòrsou un biaha mas pa e sosten i apoyo pa nos selekshon. Ban sigui kanta, sigui grita, sigui animá, sigui waya bo bandera ku bo blous pa mustra mundu kompletu kon grandi nos ta!
Nos ta topa den stadion…
