URNY FLORAN, MIEMBRO DI HUNTA DI KONSEHO DI LITTLE LEAGUE INTERNASHONAL
WILLEMSTAD- Pronto señor Urny Floran, District Administrator di Curaçao Little League lo ser nombrá komo konsehero den e hunta di Little League International situá na Williamsport.
Esaki ta despues ku señor Floran a ser apuntá dor di e dirigentenan máksimo di Williamsport.
E hunta di konseho su tarea ta pa duna konseho i rekomendashon na e organisashon di Little League riba nivel mundial, tantu di beisbòl I sòftbòl na gerensia di Little League International. Miembronan di e hunta ta ser nombrá pa un periodo di kuater aña.
E hunta aki ku ta konsistí di un total di diesdos miembro ta trese proposishon, inisiativanan, informashon perspektiva i opinion riba aspektonan aktual di e organisashon di Little League.
Tur esaki pa mantené Little League komo e organisashon di mas grandi den deporte pa hubentut riba nivel mundial.
Little League ta konsiderá e aporte di e hunta komo un parti vital pa garantisá un programa efisiente ku ta bale la pena i pa garantisá ku ta enrikesé konosementu di tur partisipante, mayornan i boluntarionan.
Urny Floran ta gradisí RBC-Royal Bank i Gobièrnu di Kòrsou pa nan sosten durante di tur e añanan na organisashon di Little League Kòrsou. Nan sosten a yuda ku nos ta vital pa e organisashon mundial di Little League, ku nos ta hopi aktivo na Kòrsou i ku nos por organisá torneonan internashonal i tambe kongreso internashonal na Kòrsou.
Danki na señor Victor Elhage ku den historia di Little League, tabata e promé District Administrator di Region Latinoamerikano ku a logra drenta komo miembro di e hunta di Williamsport di aña 2001 te 2004.
