Vários rumor di kambio den Beisbòl lokal
WILLEMSTAD- E siman aki Deporte Kòrsou a haña vários informashon di kambionan den Beisbòl Dòbel A. For di djabièrnè informashon tabata kore ku Claycandy Hariquez a firma ku Santa Maria. Na komienso di siman pasá nos a risibí un pòtrèt kaminda un dje grandinan di Royal Scorpions, Gai Lihe Barbolina tabata sintá ku Claycandy Hariquez ku semper a hunga den Hubenil i Dòbel A ku organisashon Santa Maria. Tabata parse ku Claycandy lo a firma ku Royal Scorpions, pero dirigentenan di Santa Maria a keda trankil i firma Claycandy ku tabata liber mesun siman.
WILD CATS
Den wikènt un dje grandinan di Wild Cats a sigurá ku Ruderly Manuel i otro picher Temesh Lourens lo firma ku Wild Cats pronto. Ruderly Manuel falta un aña mas ku Royal Scorpions i Temesh Lourens falta dos aña i e tambe ta di Royal Scorpions. Ta trata aki di pichernan ku tabata 1-2 den Royal Scorpions. E dirigente di Wild Cats ku a duna e tep ta un hòmber ku por pone kos pasa fásil. Wild Cats mester paga total 9000 florin pa por haña e hungadónan menshoná. 3000 pa Ruderly Manuel i 6000 pa Temesh Lourens. Tin tur indikashon ku e picher Joharvi Martinus lo firma profeshonal den 2022. E ta den training fuerte na República Dominicana i lo por firma un ratu pa otro. Joharvi tabata klave den e título di Wild Cats den 2022.
Ruderly Manuel picher di Royal Scorpions ketu bai den tapara pa Wild Cats.
MARCHENA BRAVES
Marchena Braves ta serando nan kurá poko poko, pero sigur. E hungadónan Alexander i Alex Henrietta lo firma den e dianan benidero ku Marchena Braves. Hopi interes pa dos hungadónan aki serka otro ekiponan. Alex a bati pa .486 ku 3 homerun, 11 RBI den 12 wega i Alexander a bati di .333 ku 1 homerun i 10 RBI den 12 wega. Keda pendiente pa mas firma den e dianan benidero.
Dave Kirindongo di Santa Maria Pirates Veterano agente liber
WILLEMSTAD- Dave Kirindongo ku tabata den gran forma ku Santa Maria Pirates durante kampionato 2021 di Beisbòl Veterano ta agente liber. Despues ku nos a haña e informashon di bon fuente, nos a yama Dave Kirindongo ku a konfirmá e notisia. Dave tabata tremendo den 2021 den su promé aña den Beisbòl ku Santa Maria Pirates, despues ku tabatin interes di kasi tur tim grandi den Beisbòl Veterano na komienso di temporada pasá. Dave a sali lider di homerun (5) i lider den kareda empuhá ku 16. Dave a bati pa averahe di .500 durante temporada regular. Den play-off Dave tabata krusial ku su bateo i picheo pa Santa Maria Pirates bira kampion. Ta un èks profeshonal ku a firma ku organisashon di New York Yankees na edat hóben. Dave Kirindongo a hunga den algun ekipo di Beisbòl Dòbel A ku éksito i te ku aña pasá e tabata manager ku ekipo Groot Kwartier Stars den Beisbòl Dòbel A. Dave a skohe pa bai kompletu den Beisbòl Veterano pa dediká mas tempu i pa motibu ku tempu a bira skars pa dediká na Beisbòl di den siman anochi debí na trabou. Keda pendiente pa mas detaye.
INFOMRASHON DI BEISBÒL I SÒFTÒL
Fanátikonan di Deporte Korsou bontardi i felis wikènt. Otro wikènt hopi trankil na aktividatnan deportivo. Nos ta kere ku promé ku fin di luna lo tin hopi moveshon atrobe den deporte. Den Beisbòl tin hopi bai bini pa loke ta kambionan ku tin pendiente. Urlich Snijders a pidi retiro di Santa Maria Pirates despues di bastante aña super eksitoso den e ekipo Pirata. Urlich Snijders despues di hopi aña no tin trabou tampoko i ta buskando un trabou ‘vast’. Ta un pelotero ku tin diploma di Buitengewoon Agent van Politie i ta dominá varios area mas. Un hòmber pa pone rèspèt kaminda e lo traha sigur. Lo no bai dura ku Urlich snijders alias ‘Uli’ lo haña un kos di hasi permanente.
* * * * *
Den Beisbòl Veterano ta Dave Kirindongo, sin duda e hungadó mas destaká di temporada 2021 ta agente liber. Den 2021 Dave a hunga ku e ekipo Santa Maria Pirates i hasi e ekipo kampion. Dave a sali lider di homerun tambe den 2021 ku tabata su promé aña den Beisbòl Veterano. Interes ta grandi pa e hungadó Dave Kirindongo ku por picha, hunga primera, tersera i kècher riba nivel haltu. Lo no bai dura ku Dave lo firma ku un ekipo di Beisbòl Veterano pa kampionato 2022. Dave ta hopi aktivo tambe den ekiponan Bombers (Liga Amstel), Swift (Liga van Engelen) i Tigers (Liga 40). Nos ta keda pendiente di mas moveshon di Beisbòl Veterano i Dave Kirindongo.
* * * * *
E siman aki i siman pasá nos tabata skibi di algún dato di Beisbòl Dobel A di ántes. Nos ta referí na e promé wega di Beisbòl Dòbel A den SDK i a lòs hopi dato. Tabata falta algún mas, entre otro: Promé doblete di e wega menshoná ku a tuma lugá dia 8 di aprel 1980. E promé doblete a keda konektá pa Emile Haswell kontra di Carlos Rudolf (slengu kontra slengu). Koredó sorprendé na primera tabata Henny Bernadina dor di Renato Anasagasti. Ainda ku 61 aña Renato ta master den sorprendé koredó na primera komo picher. Den e wega menshoná, esta a promé wega di Beisbòl Dòbel A den SDK, Gensley Balborda a konektá 3 hit den 4 turno. Gensley a hunga pa Blue Haws kontra e ekipo di Groot Kwartier. Ainda Gensley nos amigu ta move. Gensley Balborda ta den ekipo 60+ ku ekipo Lions.
* * * * *
By the way, vários hungadó ta yegando 59 i 60 aña pa move den Liga 60 di Sòftbòl. Nelly Jakoba ku e luna aki lo kumpli 59 aña lo ta den Nos Tambe Por, ekipo di Chan Schoop un tempu. For di aña pasá Chan Schoop a move laga ekipo i ta hunga den Curacao Super Stars 60+. Ekiponan Mon Repos Sluggers i Nos Power tin vários hungadó nobo den nan filanan. Hungadónan ku a nase aña 1963 por kuminsá move den 60+ komo 59+ durante e aña aki. Un tim por hunga ku solamente 2 hungado 59+ riba tereno durante kampionato i play-off.
* * * * *
Djaweps 3 di febrüari 2022 (siman pasá) Mairoshendrick Martinus ku resientemente dia 15 di yanüari a firma pa hunga Beisbòl profeshonal ku Los Angeles Dodgers, a kumpli 17 aña i ta bayendo bon aya na Santo Domingo, República Dominicana den kampamentu di Dodgers. Pabien na mama Popi Mutueel i tata Mayron Martinus. E otro ruman ku ta Shendrion Martinus tambe ta prospekto grandi ku chèns di firma na 2023 òf 2024. Na Little League World Series 2019 e hungadó prospekto pichando pa Kòrsou a tira ‘no hit no run’ kontra di Australia. Highlights den e wega aki ta riba You Tube naturalmente. Jurdrick Profar ku tambe lo firma. Pendiente pa firma profeshonal tambe ta Clay Winklaar ku tambe a hunga den Little League World Series na 2019.
