KOMUNIKADO PA PRENSA
VOETBALSHOP.NL I ADIDAS TA E ‘TEAMWEAR’ PARTNER NOBO DI FFK!
WILLEMSTAD - Manera nos a anunsiá resientemente, Federashon Futbòl Kòrsou a nombra Voetbalshop.nl komo su partner ofisial di unifòrm i ‘merchandise’ pa e próksimo añanan. Voetbalshop.nl i Voetbalshop.be ta parti di Badge Groep (1977) kual ta e kompania di futbòl mas grandi den Benelux.
Gilbert Martina, presidente di FFK: "Nos ta orguyoso di tin Voetbalshop.nl ku Adidas komo nos partner di unifòrm i ‘merchandise’. E tim di Kòrsou ta den un bon momento ku e partisipashon na e Mundial di FIFA 2026, pero huntu ku Concacaf, CFU i FIFA nos ta mira tambe pa dilanti riba mediano i largo plaso pa e desaroyo di futbòl na Kòrsou, konforme e plan stratégiko 2025-2029 di FFK."
Esaki ke men ku tur tim nashonal di Kòrsou lo bistí Adidas for di awor i pa dilanti. Voetbalshop i Adidas ta bai traha ku Dick Advocaat i e staf pa duna nos ekipo e mihó ‘outfit’ pa Mundial.
Roland Heerkens, fundadó di Badge i Voetbalshop(tm), ta orguyoso ku e nombramentu nobo. "Ounke e kualifikashon pa Mundial 2026 na e momentonan ei no a kaba ainda, nos a disidí di duna selekshon di Kòrsou, Adidas pa e weganan di kualifikashon kontra Bermuda i Jamaica. Entre tantu tabata weganan históriko pa Mundial, en espesial pa Kòrsou.
E vishon di e direktiva aktual di FFK, sostené pa Concacaf i FIFA, pa profesionalisá futbòl na tur nivel na Kòrsou, a pone nos disidí di bai bèk na nos promé kolaborashon di aña 2019/2021 ku FFK. E kolaborashon ta inkluí no solamente e entrega di Adidas pa tur aktividat di futbòl, sino tambe tur aktividat di benta di FFK i Blue Wave ‘merchandise’.
E demanda pa e ‘FFK i Adidas Team Curaçao oficial merchandise’ ta grandi i lo wòrdu manehá den e próksimo lunanan dor di FFK su spònser i partner di distribushon Corendon Curaçao.
Atilay Uslu, Ceo di Corendon: "Nos ta bai manehá e FFK Curaçao Fanshop huntu ku FFK. Tur ganashi (volúmen di kompra ménos gastunan) di e FFK Fanshops ta bai pa FFK pa duna forma i kontenido na e meta stratégiko pa krea un federashon di futbòl finansieramente sostenibel ku fuente di entrada nobo."
E promé FFK fanshop lo wòrdu habrí na kuminsamentu di yanüari na Sambil. Den e próksimo periodo nos ta spera hopi produkto nobo, inkluso un kantidat limitá di réplika di e kamiseta ku nos hungadónan lo usá na Mundial 2026.
FFK i Blue Wave ta, meskos ku Adidas i Voetbalshop.nl, markanan registrá.
Pronto lo bo por tin bo kamiseta ofisial di nos selekshon nashonal.
