Wega number 2 di final di Liga 60, awe, djadumingu 17 di desèmber 11’or am na Frank Curiel Ballpark
WILLEMSTAD – Djadumingu, 17 desèmber 11’or am tin wega number 2 di e playoff final di Liga 60 entre ekiponan Jaws i Pitufos. Si Pitufos gana lo tin wega desisivo pa 1’or òf mas despues, dependé ki ora wega number 1 terminá. Naturalmente weganan lo tuma lugá den Frank Curiel Ballpark den kaya Frank Curiel. Jaws a gana wega number 1 ku bon picheo di Rigoletto ‘Rigo’ Thode ku a tira henter wega. Jaws ta kampion di 2022 i un tempu tabata super kampion di Sòftbòl 60+ promé ku ekipo Los Amigos logra dos título sigí i Nos Tambe Por logra 3 kampionato sigí.
RESULTADO WEGA 1
Jaws ta gana Pitufos 2-0 den promé wega di final di Liga 60
WILLEMSTAD – Jaws ku bon picheo di Rigo Thode a gana Pitufos 2-0 den e promé wega di e seri final di Liga 60, djadumingu 10 di desèmber na Frank Curiel Ballpark. Un públiko grandi tabata presente i a mira un tremendo partido. Tur dos ekipo a menasá algun biaha i por a nota mas kareda, pero no a logra. Ekipo Jaws a nota tur dos kareda den di dos inning riba hitnan oportuno di Gibi Juliana i Marvin Wijman. Wega number 2 lo tuma lugá djadumingu awor 11’or am. Den kaso ku Pitufos gana lo tin wega desisivo despues di wega number 2 mas o ménos 1’or pm.
NUMERITONAN
Jaws a nota 2 kareda, bati 7 hit i hasi 1 eror. Rigoleto Thode tabata e picher ganadó. Ruben Snoyl i Rudsel Poulina a bati di 3-2. Pitufos no a skor, bati 7 hit i kometé 2 eror. Johan Cicilia tabata e picher pèrdèdó. Osepa, Curiel, Kook i Juliana a bati di 2-1.
%20copy.jpg)
Fanátikonan di Deporte Kòrsou bon dia i felis wikènt. Fin di siman kaminda tin wega number 2 i 3 di e gran final di Liga 60 entre ekiponan Jaws i Pitufos den Frank Curiel Ballpark. Jaws a gana wega number 1 ku skor di 2-0 tras di tremendo picheo Rigo Thode di Jaws. Den e wega ei Johan ‘Janchi’ Cicilia tambe a tira tremendo i tuma solamente dos kareda. E wega number 2 di e seri lo ta djadumingu 11’or i si ta nesesario lo hunga wega number 3 di e seri mesora despues, ke mèn 1’or òf mas despues. Ta spera un públiko grandi atrobe manera tabata e kaso djadumingu último.
Tin moveshon den Beisbòl Veterano pa bini ku un ekipo nobo. Resientemente ekipo Vosama a manda un karta ofishal pa tur hende envolví den Beisbòl Veterano kaminda nan ta informá ku 2023 tabata último aña di e ekipo. Un tremendo ekipo ku ta duna bon bataya i segun nos nan a hunga final na 2 okashon i pèrdè. Nan a pèrdè na 2005 kontra di Santa Rosa Memories i na 2011 Vosama a pèrdè den final kontra di ekipo The Bears. Un bon ekipo fundá pa Roderick Pop huntu ku su amigunan Irving Evers i otronan. Varios hungadó talentoso den ekipo Vosama ku fásilmente por hunga estelar den otro ekipo. Unu sigur ta Ryan Imperator ku lo djòin su ruman Rhiency Imperator den ekipo Yesterday. Ekipo den kual varios hungadó ku tin nèt 40 aña ta hunga i ku tur aña ta bira serio.
Kompetensia fuerte pa ekipo Quality Stars ku tabata den gran forma den 2023 kabando invikto despues di un aña di training hopi intensivo, apesar ku nan ta un ekipo ku hopi talento i hopi hóben. Ramiro Balentina a yega i pone e kosnan bira mas serio ainda. Ramiro Balentina ya tin 3 título den Beisbòl Veterano, 2 ku Santa Maria i unu ku Quality Stars. Ramiro a bisa ku ela bini Quality Stars pa kumpli ku su ruman hòmber Churandy Balentina (QEPD). Churandy tabata ke pa Ramiro stòp di hunga Dòbel A ku 40 aña + i djoin Beisbòl Veterano. Ramiro a bai Santa Maria Pirates i na 2023 a bai hunga pa ekipo Quality Stars.
Hopi interes entre ekiponan komersial i di Slowpitch pa hunga den Torneo Amstel Bright ku lo start fin di yanüari. Tene kuenta ku probablemente lo bai tin mas wega anochi, dado kaso lusnan riba tereno B na Van Engelen Ballpark keda kla. Ekiponan di Liga 60 tambe tin interesá pa kuminsá move foi tempran parse pa keda den kondishon. Liga 40 i Liga 50 tambe lo kompetí den Torneo Amstel Bright organisá pa ekipo Cicoza. Keda pendiente pa mas informashon den luna di desèmber aki, pa despues kos start den yanüari. Tene kuenta tambe ku kantidat ta limitá pa loke ta trata ekiponan. Si yega por ehèmpel 8 ekipo, ta bira difísil pa hasi ekiponan 9 en konekshon ku skema. Ryan Isebia i Pim Fangman ta e dos motornan tras di e tremendo torneo aki.
Biniendo bèk riba e ekipo nobo, parse ku lo bai tin un ekipo di èks hungadónan di Wild Cats ku a kaba di kumpli 40 aña, entre otro Ardley Jansen, Luigi Alvarez, Verney Jansen i otronan. No ta konosí ku Kenley Jansen lo ta tras di e ekipo aki ku lo bai duna bataya fuerte den e liga. Tin algun hungadó ku ta yegando 40, manera entre otro Randy Kirindongo i no ta ekskluí e posibilidat ku su ruman Dave Kirindongo di Santa Maria tambe lo djoin. Fredje Gomez tambe ta den tapara naturalmente.
Pa loke ta trata Beisbòl Dòbel A, pa 2024 moveshonnan ta ketu. Serie del Caribe 2024 lo tuma luga di 1 pa 9 di febrüari na Miami. Interesante pa sa kon lo forma e ekipo ku ta bai partisipá. Algun hungadó di no muchu nòmber den profeshonal a hasi un tremendo papel den e kampionato profeshonal. Nos ta pensa pa otro aña e promoshon mester ta mas agresivo i no konsentrá muchu riba facebook, pero aviso i spòtnan den korant i na radio tambe. Mas promoshon lo trese e veteranonan, ku si ta willing pa paga 10 florin i gasta, vèlt. Nos ta keda te aki pa awe i te djaluna ku Poder di Dios.
