Wikènt final Torneo FABB ku presensia di ekiponan di Aruba
WILLEMSTAD - Torneo FABB dediká na Cedanne Rafaela i Fai Sille a sigi djarason i djaweps ku weganan tremendo di Minor i Little League. Dos siman pasá djabièrnè e torneo a start ku un tremendo apertura. Djaweps dos ekipo di Minor i dos ekipo di Little League di Aruba a yega Kòrsou, ke mèn di 22 pa 25 di yanüari tin e parti internashonal. Weganan final dia 25 di yanüari ku partisipashon di ekiponan Minor i Little di Aruba. Organisadónan di FABB ta manda un invitashon speshal pa fanátikonan di Little League i di Beisbòl engeneral pa bin van Engelen Ballpark pa presensiá e weganan.
Torneo Survivors ta start awenochi ku 3 wega den Stadion Post 6.
WILLEMSTAD – Torneo Survivors/The Greatest ta start awenochi den Stadion Post 6. Tin tres wega awenochi pa 7.30 ku ta Coca Cola kontra di SVB sigí pa Aqualectra vs SBAB i despues Curoil kontra SOAB. Tres wega kandela awenochi pa start e torneo. E promé weganan lo tuma lugá dia 23 di yanüari na Stadion Post 6, miéntras ku e dianan 31 di yanüari, 1 di febrüari i 7 di febrüari e torneo lo tuma lugá na Van Engelen Ballpark. E kategorianan pa e edishon akí ta Liga 50 i Maskulino Soshal/Komersial. Den Soshal ekiponan ku ta den Soshal Pul A ta Brandweer, Curoil, Selikor, SOAB i VVRP. Den Pul B ta Aqualectra, Coca Cola, Corendon/Marriot, SBAB i SVB. Pa loke ta e kategoria 50+ ta Ban Serio, Jandoret, Jaws, Lions, Marlins i Survivors.
SBAB, un dje grandinan di tur tempu, inisiadó di Torneo Soshal/Komersial presente den Torneo Survivors.
Ta bai tin un torneo di dominó tambe ku tur tim partisipante por partisipá na dje. E torneo di dominó lo tuma lugá dia 1 di febrüari 2026. Ekiponan ku ke partisipá por mèldu esaki. Djarason 21 di yanüari 2026 tabatin un reunión 19.30’or na SSK, pa pasa den e reglanan di e torneo i di dominó. Djasabra tin 7 wega i djadumingu tambe tin 7 wega. Weganan ta start for di 10’or am pa terminá 9.15’or pm.
Baranka a habri aña 2026 na Playa Marie Pompoen
WILLEMSTAD- Djadumingu 18 di yanüari ekipo Baranka a habri aña na playa Marie Pompoen. Promé ku bai playa, hungadó, dirigente i fanátikonan di e ekipo a bai Misa Katóliko di Steenrijk pa despues sali pa playa Mari Pompoen. A papia en breve riba plannan pa 2026 i a hunga dominó ku kompetensia fuerte entre hungadó i fanátikonan.
MAS IFNROMASHON DI SÒFTB0L I BEISBÒL
Fanátikonan di Deporte Kòrsou bon tardi i felis wikènt. Nos ta drenta e wikènt kaminda Torneo Survivors/The Greatest ta start ku weganan den Stadion Post 6. Ekiponan di Liga 50 i di Soshal/Komersial lo ta den akshon. Nos tin e skema, ké mèn Sòftbòl a kuminsá move for di den yanüari manera ta e kaso e último añanan. Antes den yanüari tabatin Torneo Kampion de Los Kampiones organisá pa Johnny Isabella (Koktel), despues a bini Torneo Kopa Joy Alberto kaminda un ekipo di Aruba tabata bini pa hunga wega amistoso. Semper e Torneo tabata krusa ku Festival di Tumba i esnan ku bini for di Aruba ta forma un tim, den mayoria biaha un bon tim pa kompetí. Un di e timnan tabata yama Kibrá Kibrá, pero tabata leu for di kibrá.
* * * * *
E aña aki playoff di Little League ta bira kayente mes mes debí ku nos lo bai Williamsport dirèkt anto ku Kòrsou (Curacao) den pechu. Inkreíbel e kobertura ku nos ta bai haña ku Curacao den nos pechu, kaminda pais grandi lo usa, Caribbean, Europe, Asia Pacific, Latin America, Noth West, South West, New Engeland ets. Nos a kòmbersa ku managernan di e diferente liganan i e entusiasmo/espektativa ta hopi haltu rumbo pa e kompetensianan ku lo hunga un seri eliminashon dòbel i despues e seri mihó di 7. E fechanan ta 12 pa 16 di mart pa loke ta e eliminashon dòbel i despues pa 7 di aprel pa 12 di aprel ta hunga e seri mihó di 7.
* * * * *
Nos a risibí nòmber di coachnan di Little League Liga Pabou. Zaino Everett ta manager i coachnan ta Anthony Cijntje i Jeandre Pereira. Den Minor ta Dimitri Eugenia ta manager i coachnan ta Richard Lopez i Rachid Stakelburgh. Intermediate tin e sigiente coachnan: Argenis Martina ta manager i coachnan ta Ildion Martina i Rachid Ellis. Junior tin komo manager Franklin Confesor i komo coach Carol Servania i Charlton Cijntje Jr. Den Senior Quincy Virginie tei bèk komo manager asistí pa coachnan Charlie Merite i Erwin Benita. Coachnan di Senior a keda meskos ku último 3 añanan. Segun nos Minor tambe a keda práktikamente meskos. Nos ta pendiente pa e kuerpo téknikonan di Liga Pariba i di Liga Willemstad. Di Liga Pariba nos sa sigur ku ta Raylison ‘Sontje’ Gijsbertha debí ku nos a papia kuné e siman aki.
* * * * *
Curacao Professional Baseball ta start djasabra 31 di yanüari na Tio Daou Ballpark. E kampionato lo dura un siman i di 5 pa 13 di febrüari un selekshon di Kòrsou lo kompetí den Serie de Las Americas. Probablemente un planta di televishon na Kòrsou lo bai transmití. Miéntras tantu nada ainda di moveshonnan pa kampionato di Beisbòl Dòbel A, tampoko di Beisbòl Veterano. Nos tabata pasa den nos filenan di 10 aña pasá i a dal den un protesta ku ekiponan kier a hasi den Beisbòl Veterano. E protesta no a bai dor, ata aki un artikulo di aprel 2016. “E kampionato di Beisbòl Veterano lo no sigi mas por lo pronto. Dirigentenan rabiá ku asuntu di bai wes i hasimentu di fèrfelu di ekiponan a bisa ku ta basta. Hungadó i fanátikonan di e deporte hopi popular aki ta man na kabes i ta pendiente pa wak kiko nan ta bai hasi ku e bashí ku ta bai presentá. Ta hopi aktividat tin pendiente pa e aña aki, mirando ku BEVEKO lo kumpli 25 aña i ekipo Yesterday tambe lo kumpli 25 aña. E selekshon di Hulanda tambe ta pendiente pa yega fin di òktober i e tremendo idea pa laga 6 ekipo klasifiká i hunga Round Robbin pa después hunga e tradishonal play-off di 4. E ánimo ta hopi haltu pa hunga Beisbòl Veterano i ekiponan ta invertiendo basta pa nan veterano hungadó i veterano fanátikonan por dibertí.” Tur kos a sigi normal i Jandoret Raiders a gana e kampionato 2016 ku tabata nan di tres sigí. Aworaki kos ta pegá atrobe debí ku no tin directiva. Nos ta keda te aki pa awe i te mayan ku Poder di Dios.
