Wikènt final Torneo FABB Little League dediká na Gengoe Hooi
WILLEMSTAD - Nos a drenta último wikènt di Torneo Fundashon Akademia di Beisbòl Brievengat dediká na Gengoe Hooi. Despues di tres siman di kompetensia nos lo haña e gran final djadumingu awor tantu den kategoría Minor komo Little. E torneo apesar di ménos partisipashon e aña aki a bira un éksito rotundo. Tur wikènt tabatin públiko grandi na Sam Bunting Ballpark pa mira e weganan.
MAS INFORMASHON DI BEISBÒL I SÒFTBÒL
Fanátikonan di Deporte Korsou, bondia i felis wikènt. Djasabra ta e gran dia pa start ku deporte Slowpitch atrobe despues di mas ku un luna sin moveshon. Ekiponan a sera i habri aña den gran forma i awor e ora e yega pa kuminsá move riba tereno durante wega. Torneo Survivors ta start djasabra ku wega entre The New Radiator i Kooyman na Buena Vista Ballpark. Lo tin weganan di Soshal Maskulino i Soshal Maskulino Speshal djasabra riba e parke i solamente un wega di Liga 50. Djasabra tin wega na Buena Vista Ballpark, so miéntras djadumingu tin wega riba dos parke.
* * * * *
VKC a drenta na lugá di Banco di Karibe i no tin tim ainda pa remplasá Quick 60 ku ta den e pul B di Soshal Maskulino Speshal. Liga 60 pa promé biaha den e torneo lo ta den akshon djadumingu mainta na Buena Vista Ballpark, kaminda Jaws lo topa ku Los Amigos pa 10’or i despues Nos Tambe Por kontra di Mon Repos Sluggers pa 12’or. Djadumingu si tin wega na dos parke. Na Post 6 tambe tin weganan di Soshal Maskulino i Soshal Maskulino Speshal. Timnan a konfirmá den lat pa despues hala atras i ta hinka e organisadónan den pèrtá.
* * * * *
Torneo FABB lo yega su fin e wikènt aki na Sam Bunting Ballpark. Djasabra tabatin varios wega i pa djadumingu 1’or i 3’or por tin weganan semi-final. E torneo ta dediká na Roland ‘Gengoe’ Hooi, un dje grandinan di tur tempu tantu den Litlte League komo den Beisbòl en general. Kampionato di Little League ta sigiendo tantu den Liga Pariba komo Pabou, miéntras kampionato RBI tambe ta den full swing ku weganan di eliminashon dòbel. Ekiponan Royal Scorpions i Santa Rosa Indians ta bon pará sin wega pèrdí, miéntras ekiponan Sin Michiel Dodgers i Marchena Braves ta luchando pa klasifiká.
* * * * *
Tur wega ta tuma lugá na Tio Daou Ballpark. Kòrda ku weganan di Lipo Elhage RBI Curaçao 2022 por keda siguí di forma digital via iScore i tambe semper por bishitá e website www.rbicuracao.com, unda por haña tur informashon i resultadonan. RBI Curaçao tin su propio twitter account tambe bou di @CuracaoRbi i ya manera sa kaba tin e página riba Facebook. E kampionato ta posibel danki na MCB, CBDF, KNBSB, MLB i Fundashon pa Nan. Nos ta sigi e desaroyonan di RBI djaserka i boso tambe por sigi e weganan via e medionan ariba menshoná. Ekipo Sint Michiel Dodgers kampion di 2022 mester traha hopi duru pa ripití e título.
* * * * *
Promé ku nos terminá e kolumna nos tin skèdjel di e weganan di e wikènt aki den Torneo Survivors.
Djadumingu 22 di yanüari (Buena Vista): 10.00 Jaws – Los Amigos; 11.45 Nos Tambe Por – Mon Repos Sluggers; 13.30 Lab de Med – SOAB; 15.00 ADC – CPA/Fraal; 16.30 ADC – Guardian Group.
Djadumingu 22 di yanüari (Post 6): 11.30 Among Us – Quick 60; 13.00 Choonchi’s -The Fire;
14.30 Coca Cola – Selikor; 16.00 BDC - SBAB.
* * * * *
Den dianan benidero nos lo skibi algu mas di Jandoret. Djadumingu Jandoret Raiders a selebrá 27 aña di eksistensia. Jandoret a keda fundá dia 15 di yanüari 1996. Dia Jandoret a kumpli 25 aña dos aña pasá a honra algun hungadó ku na momentu ei tabatin 25 aña den e tim i awor nan a yega 27. Jeffrey Martina, Gregory Zimmerman, Raylan Capella, Charlton van Thijs, Archi Zimmerman. Renato Anasagasti i Sherdon Rombley a drenta tim e aña despues. Jandoret Raiders a sali kampion na tres okashon den Slowpitch. Na 1996 partisipando pa promé biaha na un liga, e ekipo di Jandoret a bira kampion Liga Trai Seru 1996, derotando Happy Time 2 pa 1 den un seri di tres wega. Tabata un final emoshonante, un Cirilo Chirino Ballpark kargá ku fanátiko. Por bisa kasi Jandoret kompletu tabata na Cirilo Chirino Ballpark pa wak nan ekipo bira kampion. Despues di e título a sigi un selebrashon formal den Jandoret ku optògt i brindis na sede di Jandoret Raiders, ku ta Kaya Jùfrou Polita Dirksz 16 na Jandoret. Historia. Nos ta keda te aki pa awe i te djalluna ku Poder di Dios.
