Wild Cats/St. Michiel Dodgers kampion di RBI 2021
WILLEMSTAD – Den un tremendo final di kampionato 2021 di RBI Curaçao patrosiná pa Maduro & Curiel’s Bank, Wild Cats/St. Michiel Dodgers a titulá komo kampion. E ekipo a sa di gana dos wega sigui den e seri di Mihó di 3 kontra Marchena Braves. Dos wega, tantu djabièrnè anochi komo djasabra mèrdia mester a bai èkstra ining pa asina determiná e kampion di 2021. Den promé wega, e ekipo di Dodgers a logra un viktoria di 9-6 riba Braves den 8 ining. Ku e viktoria aki Dodgers ta tuma bentaha di 1-0 i ku bista pa kaba kos djasabra mes. Braves mester gana djasabra pa alarga e seri ku un wega mas. Pa loke ta e wega di djabièrnè anochi picher ganadó tabata Claevon Lasten i mihó bateadó pa Dodgers tabata Edan Mathilda i Brandon Piña ámbos di 3-2. Pa Braves e picher pèrdèdó tabata Nwigher Francisca i Thair Sambo a bai di 4-3 na bate. Joshua Leito tabatin un honron.
Djasabra mèrdia Marchena Braves a bin fuerte pa gana i forsa un d tres wega desisivo djadumingu. Henter wega tabata mustra ku esaki lo a bai sosodé i asta faltando un out den último ining. Pero Dodgers ta empatá e wega den bom di 7 ining i asina forsa otro èkstra ining atobe. Tabata den di bòm di e último ining ku Dodgers ta anotá e kareda di viktoria pa asina laga Braves den tereno ganando e wega ku skor di 5-4 pa gana e seri 2-0 i bira kampion meresidamente. Picher ganadó pa Dodgers tabata Mairoshendrick Martinus i e mes a bai di 3-2 na bate. Picher pèrdèdó pa Braves tabata Joshua Leito i na bate tres bateadó di Braves a bai di 3-1.
Despues di wega tabatin e tradishonal selebrashon i entrega di premio. MCB ku sin duda a hasi e kampionato aki posibel pero tambe ku sosten di Curaçao Baseball Development Foundation i Fundashon pa Nan. Promé e ekipo kampion Dodgers a risibí nan trofeo i sigui pa Braves. Al final un seri digno di e kampionato ku partisipashon di 7 ekipo i ku a duna oportunidat pa mas ku 100 hóben pelotero desaroyo den nan deporte faborito, beisbòl den último parti di 2021.
Awor preparashon ta kuminsá pa forma un selekshon di U17 ku lo partisipá den un torneo na Aruba ku presensia di un ekipo tambe for di Atlanta. Tin speransa tambe ku e torneo di RBI Regional na Vero Beach na yüni lo por tuma lugá na 2022 i RBI Curaçao lo por partisipá ku un selekshon.
Danki un biaha mas na MCB, CBDF, FPN.pero tambe e ekiponan partisipante, coachnan i hungadónan i tur boluntario ku a hasi kampionato di RBI 2021 posibel.
