Yesterday t’ei normal den kampionato Beisbòl Veterano 2026
WILLEMSTAD – En konekshon ku rumornan tokante ekipo Yesterday den Beisbòl Veterano 2026, Deporte Kòrsou a tene un entrevista ku Yubi Evertsz, kende ta fundadó i doño di e ekipo.
Yubi a splika: “Bèrdat ami tambe a tende e rumornan ku algun hungadó ta bai, pero niun hende no a aserká mi ainda. Mi a tuma rienda di Yesterday bèk debí ku tabata falta disiplina. Yesterday tabata un bon tim den 2025, pero nan tabata hunga sin train i esei no ta korekto. Bo mester train sea bo ta bai pa gana òf pa dibertí. Yesterday a hasi un pa dos training na komienso, pero despues nan a stòp, tòg nan a yega leu te den playoff semifinal. Ke men, si e hungadónan a train debidamente, nos lo a yega muchu mas leu i kisas bira kampion. Mi a bisa sí, ku tur hungadó ku ke bai, por bai normal i nos lo firma nan traspaso. Nos lo sigi ku esnan ku keda fiel.”
Yubi a papia tambe riba e historia di Yesterday, kual lo kumpli 35 aña di eksistensia den e aña 2026 akí. Pa koinsidensia, BEVEKO (Beisbòl Veterano Kòrsou) tambe ta kumpli 35 aña di su era moderno e yanüari akí.
“Yesterday a bira e promé kampion di e era nobo di Beisbòl Veterano na Kòrsou. Despues Yesterday a bolbe bira kampion na 2001 i un biaha mas den un aña ku mi no ta kòrda presis awor. Otrabanda i Yesterday a drenta huntu den e era nobo akí, promé ku esei, ta Otrabanda ku Punda so tabata hunga Beisbòl Veterano.”
Pa konkluí, Yubi a duna un dato hopi interesante: Norlando Kirindongo ta e úniko hungadó aktivo den Beisbòl Veterano ku t’ei for di aña 1991. Norlando ta un dirigente i hungadó masha fiel di Yesterday. Yubi Evertsz a terminá e entrevista pidiendo e fanátikonan pa keda pendiente pa mas detaye riba e historia riku di Beisbòl Veterano i di ekipo Yesterday.
Torneo Survivors di 24 di yanüari pa 7 di febrüari
WILLEMSTAD – Torneo Survivors/The Greatest ta bèk riba despues di dos aña di ousensia. E torneo lo ranka sali dia 24 di yanüari i lo konkluí dia 7 di febrüari 2026. Ya for di luna di desèmber 2025, e Survivors/The Greatest Umpire & Scorer Crew a kuminsá manda invitashon pa e dirigentenan di e diferente ekiponan interesá. E promé weganan lo tuma lugá dia 24 di yanüari na Stadion Post 6 i na Sam Bunting Ballpark, miéntras ku e dianan 31 di yanüari, 1 di febrüari i 7 di febrüari e torneo lo tuma lugá na Van Engelen Ballpark. E kategorianan pa e edishon akí ta Liga 60, Liga 50 i Maskulino Soshal/Komersial. Inskripshon pa partisipá ta 150 florin pa kubri gastunan di organisashon i e último fecha pa esaki ta djaluna 12 di yanüari 2026 via e e-mail lindadavelaar@hotmail.com. Pa mas informashon, interesadónan por tuma kontakto tambe ku Marlon Paz na 560-2375, Wendell Anthony na 521-3028 òf Edward Pieternella na 515-0427. Durante di e torneo lo tin weganan planiá spesialmente pa ekiponan di Beisbòl Veterano, kaminda e peloteronan por bin hunga Sòftbòl. E aña akí tin un kompetensia di dominó ku lo tuma lugá pareu ku e weganan riba vèlt, garantisando un ambiente variá pa tur presente.
MAS INFORMASHON DI SÒFTBÒL I BEISBÒL
Fanátikonan di Deporte Kòrsou bon dia . Na promé lugá, nos ke deseá tur nos lesadónan un Felis Aña 2026. Lesadónan tantu na Kòrsou, Aruba, Boneiru, Islanan Riba, Hulanda, Merka i rònt mundu, nos t’ei den gran forma den 2026 pa sigi duna bon informashon di Sòftbòl i Beisbòl den e kolumna akí i riba nos página nan. E promé torneo pa 2026 ta Torneo Survivors/The Greatest ku lo start dia 24 di yanüari i terminá 7 di febrüari. Lo start na Stadion Post 6 i Sam Bunting Ballpark, pa despues sigi na Van Engelen Ballpark. Ta trata di un torneo pa ekiponan di Liga 60, Liga 50 i ekiponan Soshal-Komersial.
* * * * *
Pa loke ta Beisbòl Veterano, ekipo Yesterday ta na peliger despues ku basta hungadó a move pa otro ekiponan. Yubi Evertsz, fundadó di Yesterday, a indiká despues di kampionato ku e ke su ekipo bèk i esei a pone ku algun hungadó a move; entre otro e lider di Yesterday, Andley Simmons. Parse ku e hungadó di hopi aña den Yesterday i orguyo di Jandoret, Zhurendel ‘Chon’ Ilaria, lo a move pa Otrabanda. Nos a drenta den kontakto ku Yubi Evertsz pa mas detaye.
* * * * *
Djaluna 5 di yanüari, lo mester tabatin e draft pa e kampionato di Beisbòl Profeshonal di Kòrsou (CPB). Di 14 pa 24 di yanüari e kampionato lo tuma lugá den Tio Daou Ballpark. Esaki ta un bon oportunidat pa nos profeshonalnan tira algun wega pa mantené nan mes den kondishon, tantu prospektonan den Liga Menor komo esnan den Grandes Ligas. Den pasado, vários di e hungadónan akí tabata den akshon sea kompletu òf pa algun dia.
* * * * *
Den luna di yanüari tambe lo forma un selekshon ku lo representá Kòrsou na Serie de las Américas, ku mester tuma lugá na Venezuela di 1 pa 7 di febrüari. Naturalmente, e situashon ta basta tenso na Venezuela for di djasabra mardugá, despues ku Merka a drenta i detené Nicolás Maduro i su esposa. Paisnan ku ta partisipá den e seri akí ta Argentina, Kòrsou, Colombia, Nicaragua, Cuba, Panama, Brasil i naturalmente Venezuela.
* * * * *
Djabièrnè 2 di yanüari tabatin un konferensia di prensa kaminda Hensley Meulens a duna detaye di e Curaçao Baseball Week. E klinikanan a start djaluna na Tio Daou Ballpark pa muchanan entre 13 pa 16 aña. Tabatin klinika pa entrenadó i tambe pa umpire aya na Tio Daou Ballpark. Djamars tabatin klinika pa esnan entre 9 pa 12 16 aña i tambe pa entrenadó i umpire. Djarason a terminá na Didi Deeds pa hóbennan entre 6 pa 8 aña. E umpire femenino profeshonal, Natola Hawthorne, a duna e klinikanan akí. Vários pelotero profeshonal di Kòrsou, Aruba i otro profeshonalnan a duna e klinikanan bou di direkshon di Hensley Meulens.
* * * * *
Torneo FABB ta start djabièrnè 9 di yanüari na Van Engelen Ballpark ku partisipashon di ekiponan di Liga Pariba, Pabou i Liga Willemstad. Aña pasá, e ekipo di Santa Maria a gana den kategoria Minor, miéntras Aruba a bini ku un "dream team" den Little League i a bira kampion. Aruba lo t’ei atrobe ku ekiponan den kategoria Minor i Little. Despues di Torneo FABB, weganan di Little League lo sigi ku e kampionato rumbo pa e playoffnan ku lo start mas tempran e aña akí. Tambe nos lo tin e Kampionato di Karibe di Senior atrobe na Kòrsou na komienso di yüli.
* * * * *
Ekipo Jandoret Raiders lo selebrá 30 aña den luna di yanüari. Lo tin un Santu Sakrifisio di Misa i un enkuentro sosial despues. Jandoret Raiders, despues di hopi éksito den Beisbòl, lo stòp ku Beisbòl 50+ tambe, meskos ku nan a hasi aña pasá ku Liga 40. E ekipo di bario di Jandoret lo keda konsentrá riba Sòftbòl so, manera tabata e intenshon na komienso na 1996. Jandoret Raiders a hunga den Beisbòl Veterano di 2012 te ku 2025, loke ta nifiká 13 aña den kampionatonan di 40+ i 50+. Nos ta keda te akí pa awe. Te mayan ku Poder di Dios!
